“Structura bo mes prome, pa bo por duna ehempel na pueblo.”
ORANJESTAD, ARUBA — Gobierno ta prepara un sistema di registracion obligatorio pa vacation rentals, cu un periodo di tres luna pa propietarionan cumpli. Pero e anuncio aki ta lanta un pregunta fundamental: con Gobierno kier exigi cu pueblo cumpli cu un calendario administrativo, mientras su propio estructura ministerial ainda no ta formalisa mediante un LIM nobo vigente?
E Gobierno actual a presenta un propuesta nobo di Landsverordening Instelling Ministeries (LIM) na Parlamento, pero e legislacion no a drenta na vigor. E situacion aki ta lanta pregunta tocante e necesidad pa Gobierno pone su propio estructura institucional na ordo, especialmente awor cu e ta introduci obligacionnan nobo pa ciudadano y empresarionan.
Un deadline pa pueblo por tin su utilidad. Sin embargo, Gobierno tambe mester duna ehempel mediante transparencia, siguridad juridico y cumplimento cu su propio responsabilidadnan legislativo.
Registracion no ta solucion automaticamente
Conseho di Minister a aproba un plan pa registra y regula vacation rentals. Tur propiedad existente cu ta wordo uza pa alquiler turistico mester registra, hasta esnan cu tin permiso caba.
Gobierno ta contempla tres categoria di zona — berde, geel y cora — y cada propiedad lo pasa door di un evaluacion individual.
Pero registracion no ta permiso automatico, ni garantia di legalisacion.
E pregunta ta si Gobierno ta preparando un solucion estructural of si e ta administra temporalmente un problema cu ta exigi cambio legislativo.
E ley di bestemming y erfpacht no por wordo ignora
Un cantidad di cas na Aruba ta construi riba tereno di erfpacht cu bestemming residencial di woonhuis.
E condicionnan di erfpacht y e ROPV vigente ta establece un marco legal cu Gobierno mester respeta. Un maneho administrativo no por simplemente reemplasa e disposicionnan aki.
DIP mester atende e cuestionnan relaciona cu condicionnan di erfpacht y uso di tereno. Pa propiedad den eigendom, no tin condicion di erfpacht, pero e exigencianan di ordenacion teritorial ainda ta aplicabel.
Si Gobierno kier cambia e posibilidad di uso comercial den zonanan residencial, e mester sigui e procedura legal necesario.
Fair play: pakico Noord si y Santa Cruz no?
Imagina dos ciudadano cu a ricibi tereno di erfpacht cu e mes bestemming di woonhuis, uno na Noord y otro na Santa Cruz.
Si Gobierno ta contempla permiti vacation rental den un zona y limita e actividad den otro, e mester explica claramente e fundamento legal y territorial pa e diferencia.
E hecho cu nan tin e mes bestemming no ta elimina e posibilidad di reglanan teritorial distinto. Pero igualdad di trato ta exigi cu e distincion no sea arbitrario y cu e decision ta debidamente motiva.
No lubida e Arubiano cu ta paga hipoteca
Tin famianan cu ta depende di entrada di vacation rental pa paga nan hypoteca y mantene nan propiedad.
Un cambio di maneho por afecta e estabilidad financiero di e famianan aki. Pesei, Gobierno mester evalua derechonan existente, seguridad juridico y e necesidad di un periodo di transicion proporcional.
Proteha mercado di vivienda ta importante, pero e solucion mester tene cuenta tambe cu e ciudadano cu ya a inverti legalmente den su propiedad.
Investiga inversionistanan no-residente
Promé cu adopta restriccionnan general, Gobierno mester investiga cuanto propiedad a wordo cumpra door di inversionistanan no-residente exclusivamente pa explotacion turistico.
E investigacion mester determina e impacto real riba disponibilidad di vivienda, prijsnan di propiedad y e cantidad di ingreso turistico cu ta keda den Aruba.
Riba base di e resultado, por evalua restriccionnan legal proporcional pa actividadnan especulativo y instrumentonan pa stimula participacion local.
Parlamento mester legisla
Sinta, cana den bario y pinta cas por tin balor simbolico, pero esaki no ta reemplasa e responsabilidad di Gobierno y Parlamento pa atende problemanan structural.
Si e legislacion existente no ta suficiente, Gobierno mester prepara e cambionan necesario y Parlamento mester cumpli cu su responsabilidad di legisla y fiscalisa.
E demanda aki no ta un rechaso automatico di regulacion di vacation rentals. Ta un exigencia pa cu e regulacion ta fundamenta den ley, ta transparente y ta respeta e derechonan di ciudadano.
Aruba mester pensa riba su generacion futuro
E Arubiano no tin necesidad di solucionnan cu solamente ta tapa e problema pa un temporada. E pais tin necesidad di siguridad huridico, acceso na vivienda y un vision sostenibel cu ta proteha e generacionnan cu ta bin.
Turismo mester sigui contribui na economia nacional, pero e dividendo turistico mester beneficia tambe nos comunidad y nos residentenan.