E poblashon laboral di edatnan entre 15 te 75 aña na Hulanda Karibense a krese ku 9 porshento den 2022 kompará ku 2020, te na 15,7 mil. Durante e pandemia di corona na 2020, e kantidat di trahadó a stanka. Di e tres islanan, e kresementu tabata mas grandi na Boneiru. E oumento di e kantidat di trahadó ta inkluí tantu abitante lokal di e islanan komo imigrante. Esaki ta mustra for di den e investigashon mas resien di Forsa Laboral di Hulanda Karibense di CBS.
Na Boneiru, e poblashon laboral aktivo a krese den 2022 kompará ku dos aña anterior ku 1,4 mil (+12 porshento) te na 12,8 mil hende. Na Boneiru, 72,5 porshento di tur hende entre 15 te 75 aña tabata trahando. Na 2020, e partisipashon neto laboral aki tabata ainda 69,8 porshento.
Na Sint Eustatius, e poblashon laboral aktivo a krese ku 5 porshento te na 1,8 mil trahadó. Na Sint Eustatius, 72,9 porshento tabata trahando.
Solamente na Saba e kantidat di trahadó a baha; na 2022 tabatin alrededor di mil hende trahando, 120 ménos ku dos aña promé. Na Saba, 67,0 porshento di e poblashon di 15 te 75 aña tabata trahando.
Mas imigrante i mas hende lokal ta traha
E kantidat di trahadó lokal a oumentá ku 410 te na 8,2 mil, i ta bèk na e nivel di 2018. Trahadónan lokal ta esnan ku a nase riba un di e islanan di e anterior Antia Hulandes, esta e islanan di Hulanda Karibense òf Aruba, Kòrsou òf Sint Maarten.
Na 2020, durante e pandemia di corona <link>, prinsipalmente e kantidat di trahadó lokal a baha. Na 2020 esaki a baha ku 320 te na 7,8 mil trahadó lokal. E kantidat di trahadó ku a nase na otro lugá <link> si a krese na 2020, i despues a oumentá ku 940 mas, te na 7,5 mil.
Kresementu relativamente grandi di trahadó Dominikano i Kolombiano na Boneiru
Kasi un tersera parti di e trahadónan na Boneiru, na 2022, a nase na Boneiru. Den kantidat apsoluto, e kresementu entre e grupo aki tabata esun di mas grandi (+500). E kantidat di trahadó for di otro paisnan tambe a krese, komo resultado e porsentahe di Bonerianonan trahando a keda meskos. Bonerianonan ta traha, mayoria bes, den gobièrnu, enseñansa i den konstrukshon. E di dos lugá tabata okupá pa trahadónan for di Kòrsou, 17 porshento di e trahadónan a nase ei.
Entre e imigrantenan, prinsipalmente e kresementu di e kantidat di Dominikano i Kolombiano ku ta traha na Boneiru ta relativamente grandi. Kompará ku 2020, e kantidat di trahadó for di e paisnan aki na 2022 a subi ku mas ku 40 porshento kada un. Nan tabata traha prinsipalmente den konstrukshon i den hóreka.
Tambe na Sint Eustatius tin mas trahadó for di Repúblika Dominikana
Mas ku 40 porshento di e trahadónan na Sint Eustatius, na 2022, ta nasé na Sint Eustatius. Partikularmente den enseñansa, e kantidat di trahadó nase na Sint Eustatius a oumentá durante e último dos aña, e kantidat aki a bira dòbel.
Na di dos lugá ta e trahadónan nasé na Repúblika Dominikana (12 porshento). Kompará ku 2020, e kantidat di trahadó den e grupo aki a krese ku 36 porshento. E hendenan aki tabata traha mayoria bes den hóreka.
