Fraccion di Partido Pueblo Arubano (PPA) a para meymey di e centro economico di pais Aruba, den curason di Oranjestad, pa manda un mensahe fuerte y directo na Conseho di Minister. Den un escenario cu ta refleha e realidad amargo di e centro di ciudad, e fraccion a pone luz riba e inaccion y falta di decision di e actual gobierno, cual ta afectando tanto e patrimonio historico como e economia local.
Durante e conferencia, Lider di fraccion di PPA Eduard Pieters a mustra e contraste enorme cu ta existi den Oranjestad.
Un simbolo di decadencia: Na un banda, un edificio completamente descuida cu ta sirbi como refleho di un gobierno cu a laga no solamente Oranjestad na caya, sino tambe districtonan manera San Nicolas, Paradera, Santa Cruz y Noord. E decadencia aki ta e resultado directo di un gobernacion cu no ta tuma decision.
Inversionistanan local ta pasa pena: Na e otro banda, un edificio bunita unda inversionistanan local a hinca miyonnan di florin, pero cu aworaki mester lucha pa por haci uzo di dje adecuadamente. Pa falta di decisionnan gubernamental, e inversionistanan aki ta keda frena.
E fraccion di PPA a alerta cu e situacion aki ta creando un desanimacion alarmante den e sector empresarial. Hopi inversionista local cu tabata tin e intencion di sigui inverti den nos pais, awe ta expresa cu nan ta cla pa hiba nan capital y placanan pa otro pais si e panorama no cambia.
PPA ta enfatisa cu e solucion ta den man di e mandatarionan mes y cu no tin escusa pa sigui frena e desaroyo aki. Basando nan mes riba e marco legal di ROPV, articulo 7.2A, e fraccion a reta e Conseho di Minister pa tuma un decision mañan mes.
E inversionistanan local aki no mester sigui pasa pena, no mester sigui lembe, ni mester sigui bay prensa pa por haya nan derecho,Lider di fraccion di PPA Eduard Pieters , haciendo un yamada urgente pa stop e burocracia y duna e centro di Oranjestad y e districtonan e atencion y e decisionnan cu nan merece pa nan por florece bek.