IMF a remarca cu e recuperacion di Aruba ta impresionante, y cu Aruba mester ta hopi orguyoso
Durante conferencia di prensa di Gobierno di Aruba, Prome Minister Evelyn Wever-Croes a elabora riba e evaluacion financiero y economico positivo di IMF su Article IV Mission cu recien a wordo publica. Durante nan ultimo bishita na Aruba, IMF a haci un estudio di e posicion financiero di e pais, y a yega na un bon conclusion.
GDP a crece:
Prome Minister a indica cu e estudio aki ta confirma locual cu Gobierno tabata bin ta bisando caba, cu Aruba ta den recuperacion. Den e informacion treci padilanti pa IMF, ta indica cu ta remarcabel cu e GDP a crece na 2021 cu 27.6% y na 2022 cu 7.3%.
Deficit/ Surplus Presupuesto:
Pa loke ta e deficit / surplus di e presupuesto por a nota cu den 2 aña, e deficit a baha di -16.2% pa -0.5% y cu pa 2023 lo tin un surplus di 1%. Cu e cifranan aki, IMF a yega na e conclusion cu e deficitnan aki cu a comberti den surplus tambe ta mustra cu Aruba ta bayendo financieramente den e direccion corecto.
Gastonan di Gobierno:
Tambe ta wordo menciona den e “concluding statement” cu e gastonan di Gobierno ta apropia. Cu esaki IMF mes ta desminti tur comentario y mal informacion cu tin eyfo cu ta bisa cu gastonan di Gobierno di Aruba ta halto y mas halto cu di otro paisnan. Esaki, IMF a mustra cu no ta berdad.
Debe di pais Aruba:
Otro punto importante cu a wordi treci dilanti ta e debe di pais Aruba. Na 2020 e debe tabata na 112.3% y a logra bahe den dos aña te na 90.7%. IMF tambe a menciona cu nan ta premira cu e debe aki lo sigui baha y lo alcansa 71% pa 2028, cual ta hopi cerca di e porcentahe di e 70% cu a wordo palabra cu Hulanda pa 2031.
Desempleo:
Pa loke ta desempleo, IMF tambe a nota cu e porcentahe ta bahando. Prome cu pandemia e porcentahe aki tabata na 5.9% y a subi te na 8.8% debi na e pandemia. Pa 2022 e porcentahe aki a baha te na 6.6% y segun e analisis esaki ta bahando mas ainda. Esaki ta un indicacion cu mas hende ta hayando trabou.
Crecemento economico:
Apart di e indicadornan aki cu IMF a uza pa nan analisis, IMF tanbe a duna varios proyeccion. Un di e proyeccion positivo ta e crecemento economico cu nan ta calcula pa 2023 na 2.3% y 1.1% pa e siguiente añanan. Gobierno su deseo semper tabata pa cada aña e crecemento economico ta na 1% y awor esaki ta wordo confirma pa IMF.
Inflacion:
Otro punto positivo cu IMF a trece dilanti ta e tema di inflacion. IMF a indica cu na 2022 a proyecta cu e inflacion pa 2023 lo ta na 5.5% pero e porcentahe actual ta 4.9% y a premira cu pa fin di 2023 e porcentahe aki lo baha te na 3.2%. IMF tambe a trece dilanti algun riesgo cu Gobierno lo mester tene na cuenta. Un riesgo ta e inflacion cu por wordo afecta door di e situacion mundial.
Tambe IMF no ta convenci cu Aruba lo yega e surplus manera a indica y ta menciona cu, BBO na frontera mester wordo introduci, mester tene cuenta cu introduccion di BTW y cumisna cobra esnan cu no ta pagando impuesto. Tambe nan a menciona nan preocupacion pa cu e fondo di AOV, mercado laboral, integridad, y cambio climatico. Prome Minister a indica cu Gobierno tin atencion pa tur e puntonan menciona.
Recuperacion di Aruba ta impresionante:
“Por ultimo, IMF a remarca cu e recuperacion di Aruba ta impresionante, y cu Aruba mester ta hopi orguyoso. Aruba tabata e pais mas fuertemente afecta pa e pandemia, esun cu mas a yuda e comunidad durante pandemia y un di e poco paisnan na mundo cu ta demostrando un recuperacion asina positivo, den apenas 3 aña. IMF ta compara esaki cu un milager, pero esaki ta danki na e trabou duro di cada mama y tata di famia. Gobierno ta traha na bienestar di comunidad. Sueldo minimo y pensioen di biehes a wordo hisa, Gobierno a stop e recorte salarial, y a baha e peso di belasting pa pensionado y trahadonan”, Prome Minister a termina bisando.
1 comment
[…] Source link […]