Fraccion di MEP ta expresa su preocupacion pa e manera cu Gobierno no ta cumpli cu su obligacion pa contesta peticionan formal for di Parlamento. Fraccion di MEP a entrega mas cu 30 peticion di pregunta oficial, cu un total di 350 pregunta, pero te dia di awe no a ricibi ni un contesta formal for di e Ministernan concerni.
Esaki ta un falta di respet pa e institucion di Parlamento y pa nos democracia, caminda transparencia y acceso na informacion ta fundamental pa un Parlamentario por cumpli cu su trabou debidamente. Como parlamentario nos tin e deber y obligacion pa informa pueblo riba decisionan di gobierno cu ta toca pais Aruba y su hendenan.
Durante campaña electoral, partido Futuro a priminti den su programa di partido cu lo “introduci periodo maximo di 2 siman pa minister contesta pregunta di parlamentario.” E promesa aki, sinembargo, no ta refleha den e realidad actual, caminda peticionan ta keda sin ningun tipo di contestacion of reaccion. Ademas, Fraccion di MEP a indica cu Gabinete Wever-Croes II a introduci un maneho pa contestacion di preguntanan di Parlamento dentro di un periodo di tres siman y por nota cu esaki tampoco ta wordo sigui.
Fraccion di MEP ta exigi pa Gobierno cumpli cu su deber constitucional y legal pa contesta preguntanan di parlamento den un periodo rasonabel. Ta mediante cuestionamento Parlamentarionan por eherce nan rol di control, y pa por haci esaki manera ta debe, acceso na informacion ta esencial. E preguntanan presenta ta trata temanan cu ta relevante y urgente pa bienestar di nos pueblo, entre otro:
- Aumento di gas domestico;
- Aumento di suma pa seis fundacion;
- AAA y Schiphol;
- Efecto di Tradewar;
- Asunto di rijkswet nobo;
- Scarcedad di vivienda FCCA;
- Adaptacion lista positivo di remedi AZV;
- Eliminacion di arbeidsmarkttoets y;
- Ciere di frontera cu Venezuela.
Finalisando, Fraccion di MEP ta urgi Gobierno actual pa tuma responsabilidad y demostra nan compromiso pa traha den transparencia y colaboracion cu Parlamento, manera ta stipula den nos Constitucion y alabes den plan di Gobernacion 2025-2028. Pueblo ta merece claridad, y Parlamentarionan ta merece e respet institucional pa por eherce nan funcion como representante di pueblo.