Lider di fraccion di MEP, Evelyn Wever-Croes, a lansa un critico severo riba Minister Geoffrey Wever despues di e reciente debate parlamentario tocante e intencion pa eleva e salarionan di directornan di companianan di Estado. Segun e parlamentario, e mandatario a bandona e reunion na careda debi na e falta di confiansa y pa via cu el a keda desmascara den tres punto crucial.
Segun Wever-Croes, Minister Geoffrey Wever mes a pidi e reunion aki cu Parlamento pa trata e tema di e norma salarial pa directornan. Sinembargo, durante e debate, a keda demostra cu e argumentonan presenta pa e Minister no tabata cuadra cu e realidad.
E prome engaño: Advies di DWJZ
E prome punto cu Wever-Croes a resalta ta cu e Minister Geoffrey Wever a afirma di tin un conseho di Direccion di Legislacion y Asuntonan Huridico (DWJZ) cu ta recomend’e pa aplica un maneho cu ta faborece prome cu cambia e ley (begunstigend beleid).
Nos a lesa e advies ey di dilanti pa patras y di patras pa dilanti. Niun caminda tin un conseho pa un begunstigend beleid den dje,” Wever-Croes a declara. El a splica cu despues di un discusion di mas di shete ora, ora cu a forsa e Minister pa lesa un parti di e documento literalmente, e mandatario mes mester a reconoce cu e contenido no tabata sostene su posicion.
E di dos engaño: Falta di evaluacion di e ley
E di dos punto di critica ta relaciona cu e falta di evaluacion previo. E Minister a sostene cu e salarionan actual no ta suficiente atractivo pa profesionalnan local. Sinembargo, ora cu su mesun fraccion a cuestion’e riba cuanto profesional local realmente a rechasa un puesto of a wordo perhudica pa e norma aki, e contesta di e Minister tabata cu e no a studia ni evalua e parti ey ainda.
Wever-Croes a señala e actitud di e mandatario ora a exigi un evaluacion debi: “Den un arogancia el a contesta mi cu el a evalua loke ta importante pe. Pero esaki no ta kico ta importante pe, sino kico ta importante pa Aruba.” E lider di fraccion di MEP a remarca cu na final, tanto fraccion di AVP como di FUTURO a manda e Minister bek pa haci e evaluacionnan debi y camina e proceduranan manera debe ser.
E di tres engaño: Tratamento preferencial pa Schiphol Group
Como e di tres punto, Wever-Croes a cuestiona e trato preferencial pa e directornan di Aruba Airport Authority (Triple A) cu ta representa Schiphol Group. Mientras cu e ley ta stipula un norma di 329 mil florin pa aña pa directornan di compania di Estado, Gobierno a haci un excepcion pa e directornan di Schiphol Group, permitiendo salarionan entre 1.2 y 1.6 miyon florin pa aña.
E parlamentario a cuestiona pa kico a honra e excepcion aki pa e compania Hulandes desde aña pasa, mientras cu awor ta argumenta cu e ley aki ta stroba e directornan local y kier flexibilisa e reglanan pa nan. “Pa kico a haci e ley pa e compania Hulandes caba di aña pasa, anto awor e localnan bo ta pone nan den un caminda di krus?”, Wever-Croes a conclui.