Den cuadro di e reunionnan di e Comision di Agricultura, Pesca y Alimentacion di Parlamento Latinoamericano y del Caribe (Parlatino), e lider di fraccion di Partido Pueblo Arubano (PPA), Eduard Pieters, di bishita di trabou na Pius X School na Dakota. E bishita aki a sirbi pa duna e miembronan di Parlatino un bista di e proyectonan di salud holistico cu ta wordo aplica den e enseñansa na Aruba.
Durante e bishita, Pieters a resalta e modelo di e scol cu ta enfoca riba e disciplina di “Movecion y Salud”, cu ta bay mas leu cu e parti di nutricion so:
E lider di PPA a enfatisa cu siña e muchanan autorregulacion emocional y inteligencia emocional desde un edad hoben ta fundamental pa forma ciudadanonan fuerte mentalmente cu por hiba e pais padilanti den futuro.
E bishita tabata un oportunidad pa demostra na e parlamentarionan di e region e esfuersonan cu Aruba ta realisando riba e tereno aki, demostrando con e scolnan local ta aplicando e principionan di bida balansa y bienestar pa e studiantenan.
Pieters a compromete cu den un proximo gobernacion e tema aki lo haya prioridad:
“Den un proximo gobernacion ora cu PPA yega den gobierno, nos ta bay percura pa Movecion y Salud ta oficialmente hancra den e curiculo di enseñansa y den nos leynan. Asina tur maestro, tanto di Movecion y Salud como di enseñansa primario, por haci bon uzo di e metanan aki pa nos muchanan siña di un biaha kico ta e metanan cu nos kier riba salud.
