Durante e debatenan parlamentario recien, lider di fraccion di Movimiento Electoral di Pueblo (MEP) a cuestiona fuertemente e postura di Minister Geoffrey Wever tocante e aplicacion di e excepcion den Articulo 12, tanto pa e directiva di Aruba Airport Authority (Triple A) como pa e directornan cu a haci un peticion similar.
Den e intervencion, e lider di fraccion a expresa su desaprobacion pa e contestanan ricibi di e mandatario, catalogando nan como incompleto y poco transparente.
Diferenciacion y Dudanan riba Aplicacion di Articulo 12
E cuestionamento principal ta gira rond di e motibo pakico a duna excepcion di Articulo 12 na Triple A y pakico no a aplica e mesun procedemento desde september y november di aña pasa pa otro directornan cu, segun documentacion ricibi, a haci un peticion formal na e minister.
E lider di fraccion a responde riba e explicacion di Minister, cu a indica cu e posicion di Triple A tabata “incorecto”puntrando enfaticamente: “Kico ta incorecto? Bo a pone Gobernador firma un landsbesluit incorecto? Ki dia bo ta bay corigie?”
Ademas, a lanta e preocupacion si e diferencia di tratamento aki tin relacion cu e condicion di nacionalidad di e directornan envolvi. E parlamentario a remarca cu ta parce cu e profesionalnan local ta keda trata como “ciudadano di dos categoria” den comparacion cu esunnan cu no ta local.
Otro punto di discusion di gran peso tabata e cambionan den e propuesta di ley pa restringi e salarionan maximo (normering topinkomens). Ta exigi pa Minister splica con e ta bay garantisa cu e recuperacion di e funcionarionan aki lo ta transparente si e control a keda elimina for di e texto di ley.