Corte a declara dictamen di schorsing nulo,Joselin Croes a haya razon den cas contra gobierno di Aruba.Den un sentencia emiti dia 21 di september 2026, Gerecht in Eerste Aanleg di Aruba a declara nulo (nietig) e decision di Gobernador/Gobierno di Aruba di schors e Directora di Arubahuis, sra. Joselin S. Croes. E veredicto aki ta marca un golpi fuerte pa autoridadnan gubernamental, señalando falta di cuido, investigacion unilateral y falta di motivacion den e proceso pa schors e funcionaria.
Sra. Joselin Croes a wordo nombra como Directora di Arubahuis na Hulanda desde 1 di december 2023 pa un periodo di 5 aña. Sinembargo, desde fin di aña 2025, e relacion laboral a encontra obstaculo despues cu e Minister Gerlien Croes a pidi un investigacion independiente riba su funcionamento, alegando supuestamente un “situacion inoperabel” y iregularidad nan financiero y administrativo.
Despues di a kita su autoridad y prohibi e acceso na e edificio di Arubahuis pa varios siman, dia 17 di maart 2026 a tuma e decision via Landsbesluit pa schors sra. Croes oficialmente for di su funcion pendiente un investigacion disciplinario.
Huez den Asuntonan di Ambtenaar (mr. W.J.A.M. van Brussel) a keda hopi cla den su evaluacion y a duna sra. Joselin Croes razon den su bezwaar:
1. Falta di “Hoor en Wederhoor” (Derecho di Defensa): E Corte a subraya cu schors un ambtenaar den un posicion halto y prominente manera Directora di Arubahuis ta un medida extremadamente drastico cu ta strob’e den su trabou y ta causa daño serio na su bon nomber. Gobierno tabatin e obligacion di scucha sra. Joselin Croes formalmente prome cu a tuma e decision di schorsing, algo cu NO a sosode debidamente.
2. Investigacion Unilateral y Incompleto: Huez a constata cu e acusacionnan y supuesto nan di mal funcionamento tabata basa riba un investigacion incompleto y unilateral di Departamento di Recurso Humano (DRH). Gobierno no a duna e oportunidad na e funcionaria pa duna su version di e echonan prome cu a impone e schorsing.
3. Falta di Actualidad y Necesidad Real: Maske cu a schors e directora bou argumento di kier haci un investigacion disciplinario, durante lunanan di schorsing ningun investigacion adicional a wordo ehecuta. E investigacion di e feitenan tabata cla caba for di februari 2026, di modo cu no tabatin ningun “actueel dienstbelang” of necesidad urgente pa mantene e schorsing pa tanto tempo.
4. Acusacionnan Sin Sustento Solido: E Corte a señala tocante falta di integridad of daño na e confianza tabata carece di un base solido debi na e falta di investigacion obhetivo.
Resultado y Costo pa e Pais
Pa e razonnan aki, e tribunal a dicidi:
• Declará e decision di schorsing nulo (nietig).
• Condená Gobierno di Aruba pa paga e costonan legal y proceso di e caso.
E sentencia aki ta resalta e importancia di respeta e reglanan di bon gobernacion (behoorlijk bestuur) y e derecho di defensa di e empleadonan publico, demostrando cu medidanan arbitrario sin investigacion debi no ta sostenibel dilanti ley.