Costo di bida, turismo, salubridad, transporte publico y siguridad — tur ta den crisis. E surplus ta 700 miyon. E accion ta cero.
Como parlamentario, mi tin e obligacion di papia cla. Nos tin 5 crisis asotando nos pais y un gobierno completamente den silencio ta corta sinta tur caminda.
E realidad cu pueblo di Aruba ta bibando awendia no ta un exageracion politico. Ta un hecho diario — n’e pomp di gasolin, na e caha di supermercado, den wachtkamer na hospital, nos abo ta sinti’e. Gobierno tin e recursonan, loke nan falta ta boluntad y compromiso cu bo.
Costo di Bida y Poder di Compra
E crisis di mas agudo cu e pueblo ta enfrentando ta e subida constante den e costo di bida y e perdida di poder di compra. Tur dia e ciudadano ta sinti e sla di prijs: gas, gasolin y diesel a subi, mientras cu e prijsnan di comestibel den supermercado ta inalcansabel. Banco Central di Aruba (CBA) a bolbe bati alarma riba e inflacion creciente, mientras Minister Wever ta keda sin presenta solucionnan concreto pa trece alivio pa e famianan.
Incertidumbre den Sector di Turismo
Riba e tema di e operadornan di UTV y ATV, Oduber a critica e falta di atencion di parti di gobierno, cual a opta pa pone e pan di mas di 1000 mama y tata di famia na peliger. E decision di cera e ruta principal 50 dia prome cu e bataya legal di Aruba Birdlife Consevartion mester a cuminsa den corte a causa un impacto economico serio pa e sector. Oduber a remarca cu te cu awe no tin un solucion definitivo, pasobra solamente un protocol di intencion a wordo firma. Esaki ta totalmente incomprendibel. Parlamento a expresa nan posicion tocante e problematica cu touroperators unda cu unanimamente nos a bay di acuerdo y a urgi gobierno pa mientras cu ta keda den margen di ley nan presenta un solucion concreto y a corto plaso.
Crisis Financiero y Operacional na Horacio Oduber Hospital
E situacion na Horacio Oduber Hospital (HOH) ta sumamente grave debi na un deficit mensual di 1.6 miyon florin, un crisis financiero cu ta afectando directamente e cuido di e aseguradonan. Como consecuencia di e situacion aki, a cuminsa cera salanan di operacion, e entrega di medicamentonan esencial y materialnan di cuido a stop, y tin problemanan serio den departamentonan vital manera Endoscopie y Dialyse.
A pesar cu Minister Wyatt Ras a wordo poni na altura di e situacion aki desde februari 2026, e la opta pa keda den silencio y ignora e urgencia. Despues cu e direccion di hospital, sindicato ABV y e specialistanan a bati alarma, e minister a limita su mes na un mensahe graba anunciando un investigacion, sin presenta ningun plan di accion ni solucion concreto pa e crisis di salubridad aki.
Crisis den Arubus y Prioridadnan Incorecto di Gobierno
Arubus ta den crisis y a pidi fondo adicional pa su empleadonan, pero Minister Dowers a bisa cu NO tin placa. Esaki ta incomprendibel considerando cu gobierno ta gaba di tin un surplus financiero di 700 miyon florin. Mientras ta nenga fondo pa e compania nacional di transporte publico, si tin presupuesto pa paga un consehero 14,000 florin pa luna pa solamente 4 ora di trabou y un otro consehero 17,500 florin pa luna. E prioridadnan di e gobierno aki ta totalmente robes.
Insiguridad ta aumenta, mientras Gobierno ta corta den Husticia
Comosifuera poco, Aruba ta enfrentando un ola di insiguridad alarmante. Casonan di asesinato, atraco, ladronicia y joyriding a bolbe lanta cabes rond di nos isla. Mientras criminalidad ta aumenta, Minister Dowers ta keda ausente y den un silencio total.
A pesar cu gobierno ta gaba di tin un surplus di 700 miyon florin, a informa e cuerpo policial cu no tin recurso pa bodycams y te hasta a corta 10% den e presupuesto di Husticia. Aruba ta bibando den un gran incertidumbre, unda e ciudadano no ta sinti su mes sigur mas y unda ta evidente cu e gobierno aki no tin ningun plan di accion, ni direccion ni liderazgo pa combati criminalidad.
Cinco crisis diferente, un solo raiz: un gobierno cu tin placa pero no tin plan, cu tin surplus pero no tin solucion, cu a haya e honor di defende bos di pueblo pero ta scoge tur dia pa keda keto y bira cara ora pueblo ta pidi oido.
Pueblo di Aruba no ta pidiendo milager. Nan ta pidi loke e gobierno aki a priminti: honestidad, transparencia, placa den nan cartera y accion!