Tourism Corporation Bonaire (TCB) a organisa cu exito e Cumbre Anual di Turismo di Bonaire 2026 riba 24 di september na Van der Valk Plaza Resort Bonaire, uniendo profesionalnan di turismo, representantenan di gobierno, socionan di e industria, studiantenan y expertonan internacional bou di e tema di e aña aki: Everything is Connected (Tur cos ta conecta).
E cumbre a explora e diferente factornan cu ta forma e futuro di turismo na Bonaire, incluyendo inteligencia artificial, tendencianan global di biaha, gestion di destino, conectividad aereo, hospitalidad, turismo di cruzero, sostenibilidad, compromiso comunitario y desaroyo di producto. E programa a brinda un plataforma pa e oradornan comparti conocemento y debati con e diferente elementonan aki ta influencia otro y, finalmente, ta afecta e sector di turismo y e comunidad di e isla.
E programa di mainta a habri cu Boudino de Jong, cofundador y cabesante di innovacion na Profound, kende a presenta The Intelligent Destination: Data, AI, and Bonaire’s Next Chapter. Su presentacion a explora con inteligencia artificial y datanan por sostene un miho decision y gestion di destino mas inteligente, yudando Bonaire compronde miho e balor di e bishitantenan, sostenibilidad y e balance entre e crecemento di turismo y e capacidad di e isla.
Olivier Ponti, director di inteligencia di mercado y analisis na Amadeus, a presenta Turning Global Travel Trends Into Tourism Opportunities for Bonaire, ofreciendo un perspectiva global riba e evolucion di tendencianan di biaha y con inteligencia di mercado por yuda Bonaire identifica oportunidadnan nobo den turismo.
Un momento central di e cumbre tabata e presentacion di Elesiër Angel, CEO di Tourism Corporation Bonaire, kende a posiciona turismo den e prioridadnan economico, ambiental, cultural y comunitario mas amplio di Bonaire. El a enfatisa cu turismo mester reforsa e calidad di bida di e habitantenan mientras cu e ta proteha e recursonan natural y cultural di e isla.
Basa riba e datanan actual di turismo, Angel a destaca e 199.084 bishitante di estadia cu Bonaire a ricibi na 2025 y e estado di turismo, examinando e cambionan actual den e mercadonan di bishitante, capacidad aereo, comportamiento di biaha, duracion di estadia y gasto turistico. Ademas, el a presenta e cinco pilarnan di estrategia di TCB: Comunidad y Inclusion; Posicionamento y Imagen Global; Turismo di Halto Balor y Bahe Impacto; Desaroyo di Producto Sostenibel; y Monitoreo, Data y Evaluacion. El a resalta tambe e estudio nobo di percepcion di e habitantenan, diseña pa pone e perspectiva di e comunidad di Bonaire den e curason di e planeamento di turismo.
Mirando hacia e proximo decada, Angel a posiciona e mapa di ruta 2027–2037 como un marco di accion faha na e Visia di Bonaire mas amplio di gobierno. Su enfoque ta bay mas leu cu e cantidad di bishitante, fijando riba e balor reteni localmente, e bienestar di e habitantenan, capacidad ecologico y crecemento di calidad. El a subraya cu e meta no ta simplemente crea un destino excepcional pa bishitante, sino na prome luga un isla unda tur Boneriano por prospera. El a conclui cu un yamada na e negoshinan di turismo, gobierno, habitantenan y otro actornan pa asumi un responsabilidad comparti pa forma e futuro di Bonaire.
“Tur cos ta conecta, y esey ta nifica cu e futuro di turismo no por wordo scirbi pa TCB so. Nos responsabilidad ta pa crea e condicionnan pa turismo reforsa e calidad di bida, proteha naturalesa y enaltese nos cultura. Esey ta rekeri cu cada un di nos —gobierno, comerciantenan, habitantenan y socionan— ta haci nos parti cu un proposito cla,” Elesiër Angel, CEO di TCB, a declara.
“Nos mester ta sincero tambe tocante con turismo a wordo financia y unda nos a inverti den e añanan pasá. Logra nos vision a largo plaso ta rekeri e curashi pa cambia e manera cu nos ta inverti y pa alinea nos compromiso financiero cu e futuro cu nos kier crea.”
Marie McKenzie, vicepresidente senior di Asunto Gubernamental y di Destino na Carnival Corporation & Plc, a presenta Carnival Corporation as a Global Brand, ofreciendo un bista profundo riba e rol di un compania internacional grandi di cruzero y e relacion entre marcanan global di cruzero y nan destinonan socio.
Muryad de Bruin, director general di Curaçao Tourist Board (CTB), a comparti Curaçao’s Experiences and Insights on the Evolution from a DMO to a DMMO. Su presentacion a ofrece un perspectiva regional riba e rol cambiante di e organisacionnan di destino y e transicion for di promocion puramente comercial pa un enfoque mas amplio di gestion di destino.
Clayton Lasten, cabesante di Transformacion Digital y IA na Kruiwa, a papia tocante e aplicacion practico di inteligencia artificial den hospitalidad atraves di Running a Hotel on Artificial Intelligence: Real Lessons from Bario Hotel Curaçao. Su presentacion a explora con IA y transformacion digital por wordo aplica den e operacionnan di hotel y kico e comerciantenan den hospitalidad por siña for di un implementacion real.
Julian Gelvez, director general di Altura Aviation Consulting, a enfoca riba un di e elementonan mas importante di e infraestructura di turismo di Bonaire cu su presentacion Unlocking Bonaire’s Potential Through Air Connectivity. E sesion aki a examina e relacion entre capacidad di aerolinea, desaroyo di mercado, demanda di e destino y e oportunidadnan y desafionan asocia cu fortalecemento di acceso aereo pa Bonaire.
Veroesjka de Windt, CEO di Bonaire Hotel and Tourism Association (BONHATA), a trece e perspectiva di e sector di acomodacion pa e cumbre, contribuyendo na e debate general riba rendimento di turismo, desaroyo di mercado y e importancia di colaboracion publico-priva.
Karel Visser, CEO di Visser Family Holding, a comparti e historia di un empresa di turismo familiar local y e rol cu comerciantenan local ta hunga den forma e experiencia di e bishitante na e isla.
Günther Flanegin, capitan di puerto di Bonaire, a conclui e cumbre cu un actualisacion riba e sector di cruzero na Bonaire, cubriendo e bishitanan di cruzero, satisfaccion den e destino, relacionnan cu linianan di cruzero y desaroyo den futuro, mientras cu el a resalta e esfuerzonan pa alinea e crecemento di cruzero cu e capacidad di e isla y e experiencia di e bishitante.
E cumbre a cualmina cu e espacio Tourism After 5, brindando e asistentenan un oportunidad pa sigui cu e conversacionnan y reforsa e relacionnan den e comunidad di turismo di Bonaire.
E Bonaire Tourism Summit 2026 anual a reitera e importancia di colaboracion y responsabilidad comparti den forma e futuro turistico di e isla. Atraves di data, tecnologia, conectividad, desaroyo sostenibel, integracion comunitario y alianzanan mas fuerte, TCB ta sigui traha hunto cu e actornan clave hacia un modelo di turismo cu ta crea balor pa e bishitantenan mientras e ta contribui na bienestar di Bonaire y su habitantenan.
