Despues cu Parlamento a aproba un fondo di inversion cu un mayoria minimo di apenas diesun voto, Lider di Fraccion di Movimiento Electoral di Pueblo (MEP), Evelyn Wever-Croes, a sali na cla pa splica e motibonan pakico su fraccion a vota contra e propuesta aki.
Segun Wever-Croes, ta hopi importante pa aclaria cu e fraccion di MEP no ta contra e concepto di inverti den Aruba. Al contrario, e ta remarca cu e meta principal di genera surplus den presupuesto ta juist pa tin recurso disponibel pa haci inversion den e articulonan cu mester di atencion riba e agenda di pais. Sinembargo, e manera cu e fondo di inversion aki a wordo structura ta trece dos obhecion fundamental: un deficit financiero significante y un debilidad di e mecanismonan di control parlamentario.
Un deficit di 26 miyon florin
E prome punto di preocupacion principal pa fraccion di MEP ta e falta di e recursonan financiero pa cubri e proyectonan proponi. E gobierno a presenta un lista di deseo di e ministernan cu ta suma un total di 59.5 miyon florin den proyecto cu nan kier ehecuta. No obstante, e fondo ta conta solamente cu 33 miyon florin den efectivo.
“Kiermen, ta keda un deficit, un buraco financiero di 26 miyon florin. Nan a bini cu un fondo cu deficit, y nos di fraccion di MEP no ta aproba esey. Nos a mira caba kico deficitnan a haci cu Aruba den pasado,” Wever-Croes a declara.
E lider di fraccion a recorda e consecuencianan di e mega debenan genera den pasado haciendo referencia na e gabinetenan anterior di Mike Eman 1 y 2 señalando cu e debenan ey a causa hopi dolor financiero pa e pais y cu pueblo ainda ta pagando nan bek. Pa e motibo aki, MEP no kier duna su cooperacion na ningun iniciativa cu ta bolbe trece e risiconan di deficit.
E di dos obhecion di mas peso ta tocante e falta di transparencia y e eliminacion di e control parlamentario debi. Segun Wever-Croes, e lista di proyecto no tin un secuencia cla ni un evaluacion debi pa e Comision di Evaluacion, kende pa ley mester evalua cada un di e proyectonan.
E lider di MEP a splica cu gobierno no a manda tur proyecto pa wordo evalua, sino solamente algun cu tabata data di e gobierno anterior. E resto di e proyectonan ta keda sin evaluacion formal y ta wordo maneha abordo di lo cu e a yama “willekeur” (arbitrariedad). Esaki ta nifica cu e proyecto cu haya mas presion of menasa mas duro ta esun cu ta haya e prioridad pa wordo ehecuta.
Al final, Wever-Croes a enfatisa cu Fondo di Inversion aki no ta representa un manera responsabel di goberna ni di maneha e recursonan di pueblo.
“Door cu a kita e funcionamiento di e Comision di Evaluacion aki, e no ta duna un bista cla ni transparencia. Pa e motibonan aki, y varios otro mas, MEP a vota contra e fondo di inversion aki,” e Lider di Fraccion di MEP a conclui.