A wordo bisa publicamente cu Minister Wyatt-Ras tabata ausente, “spoorloos” y cu el a subi avion pa un biahe pa Washington.
E informacion aki no ta corecto. Minister Wyatt-Ras ta na Aruba y ta atendiendo su responsabilidadnan ministerial, incluyendo e situacion di Horacio Oduber Hospital (HOH).
E Minister tambe a aclaria cu no tin ningun biahe pa Washington programa y cu e no lo bay atende e reunion di PAHO menciona publicamente. E Minister ta considera importante cu informacion tocante su presencia y agenda wordo presenta corectamente.
E situacion di HOH ta wordo trata cu e seriedad cu e merece. Gobierno, AZV y Hospital ta den dialogo cu meta pa haya claridad tocante e situacion y pa yega na solucionnan concreto y sostenibel.
“Mi ta na Aruba, mi ta presente y ta atendiendo e situacion cu e seriedad cu e merece. Nos ta traha pa yega na un solucion sostenibel, teniendo continuidad di cuido y bienestar di e pashent como prioridad.”