Desde korto Entidat Públiko Boneiru ta disponé di dos modelo di maneho ekonómiko resien desaroyá: e modelo makro ekonómiko BONóstiko i e modelo di forsa di kompra KOMBO. Ku e modelonan akí Entidat Públiko Boneiru por identifiká e konsekuensianan ekonómiko i sosial di eskohonan di maneho mas mihó, di manera ku kada biaha desishonnan ta mas tantu basá riba dato, echo i análisis ophetivo.
Pa fortifiká e konosementu dentro di e organisashon, Ofisina Ekonómiko Amsterdam (Economisch Bureau Amsterdam – EBA) na kuminsamentu di luna di yüli a duna un treinen di dos dia pa empleadonan di Entidat Públiko Boneiru i e diputado di Asuntunan Ekonómiko. Banda di esaki a presentá e modelonan na Kolegio Ehekutivo i diferente stakeholder, di manera ku nan tambe tin konosementu di e posibilidatnan di e instrumentonan nobo akí.
BONóstiko ta hasi posibel pa sigui desaroyonan ekonómiko i kalkulá diferente senario di maneho i di futuro. KOMBO ta mustra kiko e konsekuensianan di kambio den impuesto i siguridat sosial ta pa forsa di kompra di diferente kas di famia.
Diputado di Asuntunan Ekonómiko Jennifer Mohamedjoenoes a bisa: ‘Ku BONóstiko i KOMBO nos no ta invertí solamente den instrumentonan nobo, pero prinsipalmente den konosementu i kapasidat di análisis di Boneiru. Di e manera akí nos por supstansiá nos eskohonan di maneho mas mihó, i traha riba un ekonomia fuerte i resiliente pa futuro.”
Hasiendo uso di BONóstiko i KOMBO, Entidat Públiko Boneiru ta pone un paso importante den direkshon di maneho ekonómiko profeshonal i impulsá pa dato, kaminda por midi e konsekuensianan di medidanan di maneho mas mihó.