Detenshon pa manehá bou di influensia di alkohòl
Djabièrnè 14 di ougùstùs, alrededor di 3.10 or di mardugá, a detené un hòmber di inisial F.J.S.M. di 37 aña di edat riba E.E.G. Bulevar pa manehá bou di influensia di alkohòl. Un patruya a para e outo di e sospechoso riba E.E.G. Bulevar pa motibu ku algun ratu promé, a par’é na altura di Kaya Pedro Luis Brion. Aki a dun’é but pa manehá sin reibeweis, pa no por mustra dokumentunan di seguro i pa manehá sin plachi di number patras. Ademas a dun’é atvertensia pa no manehá e vehíkulo. Pa motibu ku a bolbe mira e sospechoso ta manehá e vehíkulo, a par’é i hasi un tèst di supla kuné. A resultá ku el a konsumí mas alkohòl ku ta pèrmití pa lei. A detené e sospechoso i a transport’é pa warda di polis pa kontinuá ku e trámitenan korespondiente. Aki a hasi un análisis di rosea kuné i e lo haña un prosèsferbal tambe.
Detenshon pa buracheria públiko
Djabièrnè 14 di ougùstùs, alrededor di 12.45 or di mardugá, ‘meldkamer’ sentral a risibí notifikashon tokante un persona, probablemente bou di influensia di alkohòl, ku tabata sòru pa molèster na un establesimentu di hóreka riba Kaya Korona. Na e sitio polis a topa ku e persona enkuestion ku despues a kuminsá insultá propetario di e establesimentu. A detené e hòmber di inisial W.F.F. di 57 aña di edat pa buracheria públiko.
Ladronisia den kas
Djaweps 13 di ougùstùs a drenta keho di ladronisia na un kas situá na E.E.G. Bulevar. Deskonosínan a haña akseso na e kas i a bai ku dos brel di solo di marka Chanel. Ta investigando e kaso.
Kandela den kas
Djaweps 13 di ougùstùs, alrededor di 12.10 or di mèrdia, ‘meldkamer’ sentral a risibí notifikashon tokante kandela den un kas na Kaya Delta. E kandela tabata konsentrá den kushina di e kas i despues a pasa ofer pa sala di e kas. Brantwer a paga e kandela i kousa di e kandela no ta konosí. No tabatin herido.
Detenshon pa intento di asesinato, pa no kumpli ku òrdu di polis i manehá bou di influensia
Den oranan di mardugá di djaweps 13 di ougùstùs, alrededor di 2.50 or, un agente polisial a duna un outo sospechoso señal pa para riba Kaya L.D. Gerharts. E shofùr no a baha velosidat i a sigui kore den direkshon di e agente polisial. E agente polisial a hañ’é obligá pa kita for di riba kaminda pa evitá ku e outo ta alkans’é. Pa e motibu aki a surgi un persekushon den outo i a aktivá e lusnan óptiko(zwaailicht) i sirena pa para e vehíkulo. E shofùr a hisa velosidat i no a duna oido na òrdu di polis pa para. Riba Kaminda Tras di Montaña e shofùr a pèrdè kòntròl den un bògt i aksidentá ku su vehíkulo den mondi. Konforme e maneho di ‘botsen is blazen’ a hasi tèst di supla ku e shofùr i a resultá ku el a konsumí mas alkohòl ku ta pèrmití pa lei. A detené e hòmber di inisial A.E.J.S. di 22 aña di edat pa intento di asesinato, pa no kumpli ku òrdu di polis i pa manehá bou di influensia di alkohòl. A konfiská outo di e sospechoso.
Ladronisia den establesimentu di hóreka
Djaweps 13 di ougùstùs, alrededor di 2 or di mardugá, un patruya a konstatá ku e porta di dilanti di un establesimentu di hóreka den área di centrumgebied tabata kibrá. Despues di investigashon mas aleu a resultá ku deskonosínan a kousa destrukshon i a bai ku un kaha fuerte ku sèn kèsh for di e edifisio. Ta investigando e kaso.
A detené shofùr despues di persekushon
Djárason 12 di ougùstùs, alrededor di 10 or di anochi, polis a mira un outo riba Kaya Rita di kua e plachi di number patras no tabata visibel i e no tabatin plachi di number dilanti. Polis a duna e shofùr señal pa para pa kòntròl. E shofùr a ignorá e señal pa para, despues di kua a inisiá un persekushon. Esaki a tèrminá na Kaya Anna. Aki a detené e hòmber di inisial G.J.M. di 33 aña di edat pa no kumpli ku òrdu di polis pa para. A konfiská e vehíkulo.
Ladronisia for di akomodashon túristiko
Djárason 12 di ougùstùs a drenta keho di ladronisia for di un akomodashon turístiko situá na E.E.G. Bulevar. Deskonosínan a haña akseso na e edifisio i a bai ku un tas i un pòtmòní. Den e pòtmòní tabatin entre otro diferente karchi. Ta investigando e kaso.
Aksidente entre outo i motosaikel
Djárason 12 di ougùstùs, alrededor di 5.30 or di atardi, ‘meldkamer’ sentral a risibí notifikashon tokante un aksidente na altura di e krusada di Kaya Kanari, Kaya Pos di Amor i Kaya Flamingo. Na yegada di polis a resultá ku e vehíkulonan a dal den otro probablemente pa motibu di keda sin duna preferensia. Shofùr di e motosaikel a resultá heridá i personal di ambulans a dun’é tratamentu médiko na e sitio mes. Konforme e maneho di ‘botsen is blazen’ a hasi tèst di supla ku ámbos shofùr. No tabatin indikashon tokante uso di alkohòl.
Ladronisia for di konteiner na Kaya Maria
Djárason 12 di ougùstùs a drenta keho di ladronisia for di un konteiner na Kaya Maria. Deskonosínan a bai ku entre otro djùk di awa i diferente tènt.
Bo tin informashon ku por yuda den e investigashon tokante e ladronisia aki? Tuma kontakto ku polis via 715 8000 òf via e liña di tep anónimo 9310.
Ladronisia for di gòlfkar na sitio di sambuyá
Djárason 12 di ougùstùs a drenta keho di ladronisia for di dos gòlfkar ku tabata stashoná na e sitio di sambuyá “Oil Slick” riba Kaminda Turístiko. E personanan enbolbí a bai landa i a laga nan pertenensianan personal den e gòlfkar. Ora nan a yega bèk, a deskubrí ku deskonosínan a bai ku dos tas ku kontenido. Den e tasnan tabatin entre otro diferente karchi, sèn kèsh, un Apple iPhone 14 i un Samsung Galaxy Z Fold6. Ta investigando e kaso.