KU KURASON P’E HENDE
Djasabra último partido Union Patriotico Boneriano (UPB) a tene un rueda di prensa na Cas Patriotico, pa asina konmemorá i ala bes selebrá e di 53 aniversario di e partido. E anochi tabata bou di animashon di Foyan Boys i dirigí pa Marvin Abdul mihó konosí komo DJ Marv. Maritsa Silberie a habri e anochi ku un orashon, pa gradisí nos bon Dios pa e 53 añanan i fortalesa pa sigui trese e balansa pa komunidat Boneriano.
Lider polítiko sr. James Kroon a kuminsá su diskurso bisando: “Pa e elekshon benidero UPB kier ta un organisashon grandi atrobe. Un organisashon grandi i fuerte ku kurason p’e hende. Tambe un organisashon grandi i fuerte ku lo sigui e lucha di derecho pa Boneiru i e siudadano di Boneiru dentro di Hulanda. Boneiru a stòp di lucha pa su derechonan. E situashon aki no por keda asina aki mas. Pues UPB ta lansa su mes un biaha mas pa bira un partido grandi na Boneiru. Nos mester di e forsa di votadónan bèk pa nos por sigui e lucha di Boneiru. Ta ku forsa grandi di votadónan nos por sigui e lucha i realisá benefisionan p’e hende”.
Sr. Kroon a terminá su diskurso kompartiendo palabranan di gradisimentu pa fundadó di Partido UPB sr. Rudy “ruman” Ellis i tur ku a asistí den e parti aki, tambe na tur lidernan ku a bini promé kuné, entre otro Ramonsito “Monchi” Booi, i un danki tambe a bai pa direktiva, tur miembro di partido i tur ku ta sostené e partido.
Sr. Kroon a presentá su tim di sosten. E tim aki ta un tim intelektual ku ta sostené partido UPB i tambe su mes persona den diferente área profeshonal. E la presentá 3 miembro di e tim kual ta Yona Chirino, Marvin Abdul i Karel Visser. Sra. Yona Chirino a hiba un palabra i a enfatisá riba e trabou ku kurason p’e hende i asina seya su sosten na partido UPB. Tambe Marvin Abdul a duna un palabra kòrtiku i indiká ku su representashon ta pa futuro i hóbennan Boneriano.
Doktorá Esther Bernabela a hiba un palabra i a indiká na tur presente ku e ta kontentu ku e logronan i tambe e fayonan paso di fayo ta siña i rektifiká pa sigui. E ke mira e sosten en grande di e pueblo pa kosnan sigui kana.
Djadumingu 23 di òktober ta e aniversario di partido UPB i a selebrá esaki ku un santu sakrifisio di misa na misa di Antriol. Lider di partido i miembronan a akudí pa asina yama e ser supremo danki pa e añanan. Partido UPB ke gradisí tur ku a sostené e partido durante e 53 añanan, i ku awor mas ku nunka UPB ta kla pa sigui traha pa bienestar balansá di nos hendenan kurason p’e hende.
