Diahuebs 7 di mei, diferente stakeholder
importante den sector di salud a reuni na Surfside Marina pa participa den e
workshop “Strengthening Rehabilitation in Aruba: From Strategy to Action”. E
encuentro a marca un paso importante den e esfuerzo pa fortalece rehabilitacion
como un parti esencial di cuido di salud na Aruba.
Durante e workshop, participante nan a comparti conocemento, experiencia y idea
tocante e creciente necesidad di rehabilitacion na Aruba, especialmente mirando e
aumento di malesanan cronico, trauma y e poblacion cu ta bira mas bieu. Tambe a
wordo enfatisa cu rehabilitacion no mester wordo mira solamente como cuido
especialisa, pero como un servicio esencial den tur etapa di bida y den tur nivel di
cuido medico.
Un momento importante durante e encuentro tawata e lansamento oficial di Aruba
su Rehabilitation Strategic Plan y e steering committee cu lo guia e implementacion
di e plan aki. Participantenan a ricibi informacion tocante e vision di WHO
“Rehabilitation 2030” y con Aruba por integra rehabilitacion mihor den su sistema di
cobertura universal di salud (UHC).
Den diferente presentacion y discusionnan interactivo, stakeholdernan a identifica
prioridadnan practico pa fortalece rehabilitacion den Aruba, incluyendo gobernacion,
planificacion, servicionan basa den comunidad, capacitacion di personal medico,
financiamiento, sistema di informacion y cooperacion entre diferente
organisacionnan.
E workshop a reuni representante di ministerio di Salud, AZV, profesionalnan
medico, organisacionnan profesional, media y otro stakeholdernan relevante. E
participacion amplio aki a contribui na un dialogo constructivo entre politica,
planificacion y practica den cuido di salud.
Organisadornan a expresa satisfaccion cu e alto nivel di compromiso y colaboracion
mustra durante e workshop, y a enfatisa cu e siguiente paso ta converti e estrategia
den accion concreto pa mehora acceso y calidad di rehabilitacion pa comunidad
Arubiano.
Workshop “Strengthening Rehabilitation in Aruba: From Strategy to Action” ta marca un paso importante pa futuro di rehabilitacion na Aruba
