Un accidente fuerte a tuma luga riba e caminda patras di aeropuerto, unda un jeep blanco a perde control den un bocht y a dal den un palo di luz. E suceso a rekeri accion inmediato di autoridadnan y servicio di emergencia.
Di acuerdo cu informacion recogi na sitio, e vehiculo tabata core riba e caminda menciona ora cu, pa un motibo ainda bao investigacion, e chauffeur a perde control den e bocht. E impacto tabata di tal magnitud cu e jeep a keda para riba su dos wielnan di dilanti pega contra e palo di luz.
Na yegada di e prome patruya policial, nan a constata e gravedad di e situacion y a solicita asistencia medico y tecnico di biaha. Personal di ambulance a presenta na e sitio pa brinda prome auxilio na e personannan envolvi y posteriormente a transporta nan pa hospital pa tratamento medico adicional.
