Sector di timeshare ta sostene un salario digno pa tur trahado, y ta propone un estudio
independiente di impacto, un aumento gradual, reduccion di costo di bida via companianan di
gobierno, y compensacion fiscal pa e aumento di gastonan salarial.
ATSA ta comparti e meta tras di e proposicion di gobierno: tur persona cu ta traha un siman
completo na Aruba mester por cubri nan necesidadnan basico. Esaki no ta na discusion. Loke
si ta na discusion ta con nos ta yega na e meta aki, y si un salario mas halto lo sigui tin e mesun
balor pa trahadonan un aña despues cu e aumento drenta na vigor.
Actualmente, salario minimo legal ta situa rond di Afl. 2.007 pa luna, mientras cu e minimo di
subsistencia (bestaansminimum) pa un persona soltero, segun dato publica pa CBS, a yega Afl.
2.700 na september 2026. Cerra e diferencia aki den un solo paso ta nifica un aumento di
aproximadamente Afl. 690 pa luna, of rond di 35%.
Si nos agrega e primanan y cargonan patronal di aproximadamente 25% riba salario bruto, e
costo real pa un empleador ta acerca Afl. 860 extra pa trahado pa luna. Esaki ainda sin conta
cualkier ahuste salarial pa empleadonan cu actualmente ta gana un tiki mas cu salario minimo.
Un cambio di e magnitud aki mester ta basa riba evidencia, no riba un fecha limite.
Un aumento di salario riba su mes probablemente no lo ta suficiente sin medidanan cu ta
proteha poder di compra, empleo y e viabilidad di empresanan.
Dicon investigacion mester bin prome?
– E meta ta cambia constantemente. E minimo di subsistencia ta ser recalcula segun cu prijsnan
ta cambia. Solamente entre juli y september 2026, el a subi di Afl. 2.683 pa Afl. 2.700. Conecta
salario minimo directamente na un indice cu ta subi hunto cu prijsnan ta crea e riesgo di un
circulo di aumento salarial y inflacion, den cual trahadonan constantemente ta purba alcansa un
meta cu ta sigui aleha di nan.
– E calculacion ta basa riba datonan bieuw. E calculacion di minimo di subsistencia ta basa riba
datonan di gasto di hogar colecta aproximadamente 20 aña pasa. E manera cu famianan
Arubiano ta gasta nan placa awe ta hopi diferente. Un investigacion actualisa di presupuesto di
hogar mester ta e punto di salida pa cualkier decision serio.
– Salario individual no ta mescos cu entrada di un hogar. Tin trahadonan cu salario minimo cu ta
biba den un hogar cu varios fuente di entrada, mientras cu otronan ta mantene dependientenan
cu un solo salario. Actualmente, ningun hende por bisa cu precision cuanto hogar ta biba bou di
e minimo di subsistencia, y pues tampoco ken realmente tin mas necesidad di ayudo.
– Compensacion total no ta ser inclui den e calculacion. Den sector di hospitalidad, propina,
cargo di servicio y bonusnan monetario frecuentemente ta forma un parti significante di e
entrada cu un empleado ta hiba cas. Esaki ta ademas di beneficionan no monetario, manera
cuminda, transporte y uniform. Ta tene cuenta cu esakinan ora compara salario cu minimo di
subsistencia? Si no, e diferencia por ta exagera pa algun trahado. Mientras tanto, pa esnan cu
ta depende di propina cu ta varia, e inseguridad di nan entrada real por ta ser subestima. Un
estudio mester contesta e pregunta aki explicitamente.
– Salario bruto no ta salario neto. Un parti di e diferencia entre salario minimo y minimo di
subsistencia ta consisti di impuesto y prima. Un parti di e diferencia aki por ser cerra via
aumento di salario neto, sin costo adicional pa empleadornan.
Tecnologia ta cambia e situacion
Investigacionnan tocante salario minimo ta indica cu aumentonan modera y previsibel
generalmente tin un efecto limita riba empleo, mientras cu aumentonan grandi y repentino ta
trece mas riesgo. E efectonan aki frecuentemente ta manifesta nan mes prome den reduccion
di ora di trabou y un ritmo mas lento di contratacion.
Awe tin un factor adicional: sistemanan di self-service check-in, kioskonan digital, pedido online
y reservacionnan maneha pa inteligencia artificial (AI) ta awor accesibel y relativamente
pagabel.
P’esey, nos mester haci e pregunta: ora costo di personal ta subi drasticamente di un dia pa
otro, kico un empresa cu margen di ganashi limita ta haci?
Pa hopi empresa, e contesta lo ta automatisa.
Y cua puestonan di trabou lo desaparece prome? Recepcion, cahero, centro di yamada y
trabounan administrativo (back office): precisamente e puestonan cu e politica aki ta busca
proteha.
Kico balor un salario minimo mas halto tin pa un trahado cu su puesto a ser reemplasa pa un
kiosko?
Prome cu tuma cualkier decision, e investigacion mester identifica cua puestonan di trabou ta
mas expuesto na automatisacion.
Costo di haci negoshi ta e otro banda di e medaya
Salario ta solamente un parti di un estructura di costo cu ya ta entre esnan mas halto den nos
region.
Esaki ta inclui awa y coriente, telecomunicacion, derecho di importacion, impuesto riba omzet
(BBO), cargonan di waf y aeropuerto, y huur.
Unda cu margen di ganashi ta limita, un aumento repentino den gasto salarial no por
simplemente ser absorbi pa un empresa.
E costo adicional ta ser pasa pa consumidor via prijsnan mas halto, incluyendo prijsnan di e
mesun productonan esencial cu ta forma parti di e calculacion di minimo di subsistencia.
Como resultado, un parti di e beneficio di e aumento salarial ta disparce.
Cada costo cu Aruba logra kita for di e sistema economico ta alivia e carga tanto pa
empresanan como pa hogarnan.
Cera e diferencia di tur dos banda: loke ATSA ta propone
1. Un estudio independiente di impacto prome cu tuma cualkier decision.
E estudio mester ser lidera pa CBS y Banco Central di Aruba, den colaboracion cu e socionan
social, y mester inclui:
● Un investigacion actualisa di presupuesto di hogar.
● Entrada total na nivel di hogar.
● Compensacion total di empleadonan, incluyendo propina, cargo di servicio y bonusnan.
● E efecto pa cada sector economico riba costo, prijsnan, ora di trabou y empleo.
● E efectonan indirecto pa empleadonan cu ta gana mas cu salario minimo.
● E riesgo di automatizacion pa diferente puestonan di trabou.
2. Un estudio di companianan di gobierno.
Te na ki punto companianan den propiedad di gobierno, cu ta opera den sectornan di utilidad
publico, telecomunicacion, waf y aeropuerto, por reduci nan costo y tarifanan?
E meta ta pa necesidadnan basico manera electricidad, awa, internet y cuminda importa bira
mas barata.
Reduci e costo real di subsistencia ta cerra e diferencia sin necesidad di agrega ni un florin na
gasto salarial di empresanan.
3. Compensacion fiscal pa aumento di gastonan salarial.
E opcionnan ta inclui:
● Un reduccion temporal di primanan social cu empleadornan ta paga pa puestonan cu
salario mas abou.
● Un subsidio dirigi pa compensa gasto salarial di empresanan.
● Un aumento di e limite di entrada liber di impuesto, pa cu salario neto por subi sin
aumenta costo salarial pa empleadornan.
● Alivio di impuesto riba omzet pa productonan esencial.
E medidanan aki mester ta transparente, proporcional y suheto na control adecuado.
4. Un trayecto gradual y previsibel.
Un programa di varios aña, publica oficialmente, cu momentonan fiho pa evaluacion.
E proceso mester ser monitorea pa un organismo salarial independiente, cu ta presenta un
informe anual tocante prijsnan, poder di compra y empleo.
Esaki por sigui e modelo di comisionnan pa salario abou cu ta ser uza den varios pais Europeo,
cu e posibilidad di ahusta e ritmo di aumento ora cu e datonan ta indica cu esaki ta necesario.
Nos mester midi prome cu actua
Ningun hende den nos sector ta pone na duda cu un persona cu ta traha fulltime mester por
biba dignamente na Aruba.
Loke nos ta pidi ta pa nos midi prome cu actua.
Un aumento salarial cu ta ser consumi pa prijsnan mas halto, of cu ta costa un persona su
trabou, no a yuda e trahado ey.
Laga nos reuni e datonan necesario, reduci costo di bida unda cu gobierno tin e posibilidad di
hacie, compensa e carga salarial di manera hustifica, y despues avansa paso pa paso den
direccion di un salario digno y sostenibel.
ATSA ta mantene su compromiso cu e Dialogo Social y ta dispuesto pa contribui cu datonan y
conocemento specialisa for di sector di timeshare den e investigacion cu e asociacion ta
propone.