Directie Volksgezondheid (DVG) kier informa
comunidad tocante Hantavirus y e riesgo limita cu e malesa aki ta representa te na e
momento aki pa Aruba.
Hantavirus ta un malesa zoonotico cu por wordo transmiti door di raton of djaca
infecta pa hende. Segun expertonan y investigacion cientifico, den cierto variante
specifico manera Andes virus, transmision di hende pa hende tambe por sosode,
pero generalmente solamente den contacto hopi cerca y prolonga cu un persona
infecta manera cerca pareha y dunadornan di cuido of familiar (mantelzorg).
Na Aruba, no tin indicacion cu nos populacion local di raton of djaca ta infecta cu
Hantavirus. Pa cual motibo, e posibilidad di transmision di animal pa hende na Aruba
ta considera hopi limita.
Actualmente Aruba no tin caso confirma di Hantavirus. Unico posibilidad pa
introduccion di e virus na Aruba, ta si un bishitante of residente regresa Aruba
despues di un biahe pa un area unda Hantavirus ta presente manera:
Argentina
Chile
Bolivia
Paraguay
Uruguay
Brazil
Segun literatura, e periodo di incubacion di Hantavirus por varia entre 1 te 6 siman
prome cu sintomanan cuminsa aparece. E sintomanan inicial por inclui:
• Keintura
• Dolor muscular
• Cansancio extremo
• Dolor di cabes
• Nausea of sacamento
• Tos seco
• Problemanan respiratorio
Den caso serio, Hantavirus por afecta pulmonnan y crea complicacionnan
respiratorio severo.
DVG ta recomenda personanan cu a biaha of ta planea pa biaha pa paisnan of
areanan di naturalesa den paisnan unda Hantavirus ta presente, pa evita mishi cu
animalnan salvahe bibo of morto. Ta importante pa keda alerta y conciente di nan
salud durante y despues di nan biahe y si desaroya sintomanan ta importante busca
atencion medico y informa doctor tocante nan historia di biahe.
Ademas, DVG ta conseha comunidad pa sigui solamente canalnan oficial y
informacion confirma di autoridadnan competente pa evita confusion, speculacion of
wordo mal informa door di informacion incorecto cu ta circula riba red social y otro
plataforma digital.
Directie Volksgezondheid ta sigui monitor constantemente tur desaroyo internacional
y regional pa evalua risico y impacto cu Hantavirus of otro malesa por representa pa
salud publico di Aruba y lo continua informa comunidad debidamente.
Bo Salud, Nos Prioridad
Pa mas informacion, like nos Facebook page Directie Volksgezondheid DVG Aruba,
follow nos riba Instagram directie_volksgezondheid_aruba, sigui nos den WhatsApp
Channel, ricibi tur informacion den Aruba Health App, bishita www.dvg.aw, yama
5224200 of manda email na servicio@dvg.aw