ORANJESTAD,Aruba
Riba Facebook di Gobernador di Aruba , por a tuma nota di un bunita storia historico. Dia 30 di december 1959 e buque granelero a wordo lansa na awa door di Scheepswerf Westerbroek v/h J.G. Broërken na Westerbroek (Hulanda). E barco di 749 tonelada bruto, 57,8 meter (189,5 pia) di largura y 10,3 meter di hanchura, a wordo inaugura na maart 1960 cu e nomber “Blackthorn”. MV Blackthorn a nabega den awanan Britanico bou di bandera di Gran Bretania, pa e compania Thorn Line Ltd. Pero e tabata wordo maneha pa S. William Coe. & Co. Ltd di Liverpool (Gran Bretania). Na 1965 S. William Coe. & Co. Ltd a cumpra e barco, pero a mantene e mesun nomber di MV Blackthorn.
RUDYARD
Na 1976 ela wordo bendi na e compania Effluent Services Ltd, na Macclesfield, Gran Bretania. Aki ta caminda cu a cambia su nomber pa “Rudyard”. E mesun aña ela wordo bendi na Robert Alber Edward Williams, kende a comberti e barco den un ‘aggregate carrier’ cu su mesun ekipo di carga/descarga. Ela keda nabega bou di e nomber di Rudyard.
JANE SEA
Na 1980 e barco a wordo bendi na Essandee (S&D) Shipping Ltd, di Bembridge pero a registr’e na Shoreham, Gran Bretania. E doño nobo a cambia nomber di e barco pa “Jane Sea”. Na 1983 Jane Sea a wordo bendi na De Roche Enterprises Ltd, di Trinidad, mientras cu ela keda registra na Shoreham. Na september di 1984 e barco a bin carga cu cement di Costa Rica (pero a pasa probablemente via Venezuela) y a mara na waf di Barcadera. Den waf ela haya problema grandi cu su motor y no a tarda mucho pa ela wordo bandona door di su tripulacion. Ela keda den waf te na 1985, ora cu APA a laga pone beslag riba dje y a purba bende e barco na findishi pa cubri e gastonan portuario. Esaki no a duna resultado y despues a organisa un di dos benta cu tambe a faya. Na november di 1987 a lanta e beslag despues cu a logra bende e barco cu Ivan M. Tarr. Na december di 1987 a prepara e barco pa por sink esaki pa uso como obheto di buseo. Dia 4 di september 1988 a tou e barco pa hib’e patras di rif di Barcadera (posicion 12.29N., 69.59W.), caminda cu a sink esaki na un profundidad di 27 meter.
Mala-lenga ta bisa cu e barco a wordo haya cu cocaina entre e cement ora cu ela drenta ultimo biaha na waf di Barcadera. Y tambe ta wordo bisa cu e tripulacion a bandona e barco asina lihe pa motibo cu nan tabata wordo mal paga. Pero esakinan ta informacion cu no por wordo confirma.
Detaye di e barco: motor diesel di Crossley Brothers, 907 brake horsepower, single shaft cu 1 chapaleta, velocidad maximo di 11 nudo, call sign GGCH, IMO no. 301329.
Fuente y potret: dreamwrecks, uponarriving, willemsubmerged.wordpress, puredivingaruba, wrecksite-eu, IMO, APA.
Video: Vincent Boekhoudt
