Fraccion di Movimiento Electoral di Pueblo (MEP) ta anuncia cu lo tuma siguiente pasonan legal contra Gerlien Croes despues cu, segun nan, e minister no a cumpli cu su obligacion pa contesta preguntanan oficial di Parlamento di Aruba.
Segun lider di fraccion di MEP Evelyn Wever Croes , durante varios luna nan a intenta haya claridad riba tres pregunta relaciona cu un biahe den jet priva:
- Cuanto a paga;
- Na ken a paga;
- Ki dia a paga.
MEP ta indica cu e preguntanan a wordo presenta for di 19 di november, pero te na awe no a haya respuesta concreto.
Procedura parlamentario y LOB
Segun MEP, nan a haci preguntanan por escrito y tambe a trata di trata e tema den Parlamento. Nan ta señala cu presidente di Parlamento, Marlon Sneek, no a convoca un reunion pa trata e asunto.
Posteriormente, fraccion di MEP a usa e Ley di Openbaarheid van Bestuur (LOB), cu ta permiti cualkier ciudadano pidi informacion oficial. Segun e ley, un minister mester contesta den tres siman, cu posibilidad di tres siman adicional si tin motibo hustifica.
MEP ta afirma cu despues di seis siman, minister Croes a responde cu e peticion “no ta bon formula” y cu e no ta considera e solicitud. No obstante, segun MEP, e minister no a specifica kico tabata supuestamente incorecto den e peticion.
Fraccion di MEP a duna un plaso adicional di cinco dia pa haya aclaracion, pero segun nan, e deadline di 26 di februari 2026 a pasa sin respuesta.
Referencia na Codigo di Conducta di Minister
Fraccion di MEP ta enfatisa cu tur minister ta suheto na un Codigo di Conducta di Minister, cu ta exigi transparencia, responsabilidad y obligacion pa duna informacion corecto y oportuno na Parlamento. Segun MEP, un minister mester actua conforme principio di integridad, apertura y rendicion di cuenta, specialmente ora Parlamento ta haci preguntanan oficial riba gasto publico.
Referencia na pacto politico anterior
Lider di fraccion di MEP a recorda cu den pasado, ora minister Croes tabata parlamentario, el a forma un alianza politico cu Misha Raymond di partido RAIZ durante un proceso parlamentario cu a culmina cu a baha minister Endy Croes . Segun MEP, e antecedente aki ta mustra cu minister Croes ta plenamente consciente di reglanan parlamentarionan y di responsabilidad cu ta acompaña su cargo.
MEP ta sostene cu e falta di respuesta claro ta na contradiccion cu e spirito di e codigo aki, cu tin como meta proteha confianza publico den gobernacion.
Paso legal y investigacion independiente
Mirando cu no a haya respuesta, MEP ta prepara un proceso hudicial pa obliga e minister contesta e preguntanan pendiente. Segun lider di fraccion MEP , pueblo di Aruba tin derecho di sa e dato exacto riba gasto publico.
Ademas, fraccion di MEP a manda documentacion na Bureau Integriteit pa un investigacion independiente riba si e minister a actua conforme codigo di conducta y reglanan di integridad. E dossier tambe a wordo hiba na Ministerio Publico pa evaluacion propio riba si tin algun aspecto penal den e caso.
Posibel consecuencia politico
Segun lider di fraccion, si resultadonan di investigacion confirma falta grave di responsabilidad of violacion di norma di integridad, Parlamento mester considera paso politico consecuente, incluyendo un peticion formal pa baha minister Gerlien Croes for di su posicion.
Si Parlamento kier traha conforme ley y integridad, no tin otro opcion cu actua,” lider di fraccion di MEP a declara, añadiendo cu transparencia y confianza publico mester ta central den gobernacion.
Segun MEP, ora e resultado di investigacionnan ta cla, Parlamento mester evalua e situacion y determina si tin base pa tuma accion politico. Fraccion di MEP ta sostene cu transparencia y responsabilidad ministerial ta principio fundamental den un estado di derecho.
Te na momento di publicacion, minister Gerlien Croes no a reacciona publicamente riba e reciente declaracion di MEP.