Diadomingo 29 di januari 2023 anochi den careda di 7’or alarma a wordo bati pa un auto cu a drenta mondi den bocht cerca di veld di futbol, a wordo bisa cu lo ta trata di un accidente basta serio.
Mesora patruyanan cu a yega e sitio a pidi pa ambulance y tambe unidad di rescate di Brandweer, mirando cu e chauffeur cu ta un hende homber a keda pega den e auto.
Tabata trata di Nissan Cube, cu pa un of otro motibo a perde control ariba e vehiculo a bay termina den e mondi unda tin un rooi ta core. Brandweer mester a uza bastante cautela momento cu nan a bay libera e chauffeur, e no tabata algo facil nos a compronde na e sitio.
Pero despues di basta rato y un bon trabou di Brandweer a logra libera e chauffeur y pase over pa Paramediconan cu tabata cla para eynan mes pa atende cu e victima.
Departamento tecnico y polis di trafico tabata na e sitio pa conduci e investigacion. Pero, tur cos tabata duidelijk pa polis cu ta un auto envolvi y cu tur cos ta indica cu e la perde control of no tabata sa cu tin un bocht eynan.
E la wordo transporta pa Hospital y polisnan di trafico tambe a bay Hospital pa pone nan mes na altura di su situacion.Ora cu e la wordo saca por a mira cu e lo tabata for di tino.
