Un paso importante pa nos sistema hudicial
Prome hende muhe Arubiano instala como vice-presidente di Corte den Prome Instancia
Den un ceremonia na Hyatt Place a tuma luga e instalacion oficial di tres hues nobo pa Corte den Prome Instancia di Aruba. Minister di Husticia mr. drs. Arthur Dowers a asisti n’e acto y a expresa su satisfaccion cu e desaroyo importante cu ta tuma luga den e aparato hudicial di nos pais.
Minister Dowers a indica cu e instalacion aki ta un indicacion di progreso y ta habri e porta pa mas participacion di hendenan local den e sistema di husticia tanto na Aruba como den otro parti di e Reino. “E ta fundamental pa tin un corte cu balansa cu hendenan cu ta wak e ley for di diferente perspectiva y experiencia di bida,” E mandatario a indica tambe cu “Aruba ta un comunidad chikito, unda tur hende conoce otro y ta precisamente pa motibo ey cu ta bon pa tin hues for di otro origen, pa garantisa imparcialidad y obhetividad.” Un di e huesnan instala ta mr. Jane Jansen, e prome hende muhe Arubiano awor den funcion di Vice-Presidente di Corte den Prome Instancia na Aruba y ta forma parti di e maneho diario di Corte Comun di Husticia di Aruba, Corsou, Sint Maarten y islanan BES. Hues mr. Jansen tin amplio experiencia den belastingrecht (derecho fiscal), tanto na Aruba como den otro parti den Reino Hulandes. E otro dos huesnan instala ta “strafrechters” procedente di Hulanda cu a bin Aruba den cuadro di “bestrijding van ondermijning”.
E Minister di Husticia a recorda cu 15 aña pasa tabata su mesun ministerio cu a realisa e transicion den Corte den Prome Instancia conforme cu rijkswet. E tempo ey tabatin un gran cantidad di caso pendiente cu tabata pone presion excesivo riba e aparato hudicial. Ministerio di Husticia e tempo ey mester a duna sosten pa yuda alivia e presion riba Corte den Prome Instancia. Tambe a pone enfasis riba ley y desaroyo legal cu ta den proceso y cu den colaboracion cu Hof, por duna un sosten structural pa trata e casonan mas lihe y cu mas eficiencia. Pero, segun e minister t’e mesun problema cu el a tende 15 aña pasa; falta di placa, falta di personal y falta di material a ripiti den e discursonan di Hues de Kort y Jansen.
“Ora e Gobierno ta gaba cu surplus aki y surplus aya, ta a costo di kico?” Minister Dowers a subraya. Den nos sistema di husticia, e falta di inversion specialmente den recurso humano, a resulta den stagnacion y ineficiencia. Esaki no solamente na Corte den Prome Instancia, sino na varios departamento cu ta resorta bao e Ministerio di Husticia. Esaki tin consecuencia directo p’e calidad di servicio cu e pueblo tin derecho riba dje. Minister di Husticia ta reafirma su compromiso pa sigui traha pa un sistema hudicial mas fuerte, mas eficiente y mas husto cu e apoyo institucional cu esaki merece.
