Riba e tema di e regulacion y maneho di e vehiculonan ATV y UTV na Aruba, ta fundamental pa haci un aclaracion historico y politico di e responsabilidad nan ministerial durante e ultimo gabinete di coalicion (MEP–RAIZ). Contrario na e percepcion cu algun sector kier crea, e cartera y e maneho directo di transporte publico, naturalesa y medio ambiente tabata cay ricamente bou di e responsabilidad di e partido RAIZ, encabesa e tempo ey pa e ministernan Urcell Arends y Geoffrey Wever.
Maneho di un pais ta wordo reparti pa cartera ministerial, y den e constelacion di e anterior Gobierno, e decisionnan y e planificacion relaciona cu e impacto di ATV y UTV riba nos naturalesa y riba e red di transporte tabata completamente den man di e lidernan di RAIZ.
E rol y e decisionnan di e partido RAIZ
E decisionnan cu a wordo tuma e tempo ey tabata forma parti di e vision y e liña di trabou cu ex-minister Urcell Arends a hiba, sostene pa su colega di partido Geoffrey Wever, kende tabata plenamente na altura di e plannan y e strategianan cu tabata wordo desaroya.
E impactonan y e consecuencianan di e maneho aki tanto riba e organisacion di e transporte, e proteccion di nos medio ambiente, como e situacion politico general ta resultadonan directo di e liña cu e partido RAIZ a scoge pa cana. E decisionnan aki a laga secuela profundo den e sistema politico di e pais, di cual e efectonan ta sigui sinti te cu dia di awe.
Un herencia cu e actual gobernacion mester atende
E situacion actual cu e sector di ATV y UTV ta enfrentando no ta un producto di e maneho di MEP, sino un herencia cu a wordo genera pa e maneho di e partido RAIZ. Awe, e actual Gobierno encabesa pa AVP ta sinti e peso y mester carga cu e consecuencianan di e decisionnan cu a wordo tuma den e periodo anterior.
Ta di sumo importancia pa e publico ta debidamente informa y consciente di con e carteranan tabata reparti, pa asina por determina cu claridad unda e responsabilidad politico di e maneho di ATV y UTV ta resida realmente.
Ursell Mikhail Arends tabata minister di Transporte, Integridad, Naturalesa y Asuntonan di Adulto Mayor di 2021 pa 2025. Su persona tabata responsabel riba e plan y desicion cu awe Aruba tin e impacto aki. Tampoco no tabata un secreto cu Ex minister Ursell Arends tabata haci tur loke presidente di Aruba Bird Life Conservation Grec peterson tabata pone riba mesa, un otro situacion biba tabata e dolor di cabes cu e cadena di hotel Embassy Suit a pasa aden door di e mes un dos persona nan aki.