Distraccion y division ta hopi na moda, pasobra nos tur mester sa cu for di principio di mundo ta para skirbi den Genesis 3 cu e diabel ta enemigo di Famia y e kier destrui Famia, p’esey awendia nos mester para firme cu nos Famia den caminda di Señor.
Ta hopi trampa tin, p’esey nos mester di sabiduria y discernimiento di Dios y esey nos ta haña ora nos busca intimidad cu Dios, den oracion, ayuno, vigilia y lesamento di Su Palabra.
Tur caminda tin hende cu ta troce e palabra, profeta falso manera ta wordo menciona den Mateo 24:4 bisando: Mira pa ningun hende no gaña boso, pasobra hopi lo bin den Mi nomber bisando ta ami ta e Cristo.
Awor nos tin tene bon cuenta cu tur locual ta artificial , pasobra tur cos a bira artificial y nos tur sa e plan di e enemigo tras di esaki, pasobra e diabel ta un gran copiado y e lo usa e tipo di inteligencia aki pa gaña hopi hende, especialmente nos hubentud, pasobra e kier mantene nan den su gara.
No solamente bisa ami y mi cas ta sirbi Señor, pero wak pa e bira un forma di bida, un compromiso berdadero cu Dios, pasobra e dianan ta malo y nos tin cu wak con nos ta cana.
No permiti nada ni tampoco ningun hende aleha bo for di caminda di Dios, mihor bo perde un amistad pa Cristo , cu perde Cristo pa motibo di un amistad, Mantene bo prioridad spiritual na halto, cual Cristo Hesus den bo bida.
No bandona bo lugar di ricibi palabra di Dios pa motibo di hende, pero permanece fuerte den e palabra pa asina e adversario cu ta e diabel tin cu hala tras ora e ripara cu abo no ta entrega.
Juan 10:28-29 ta demostra nos e seguridad cu nos tin ora nos ta den man di Cristo Hesus.
Mi carnenan ta tende Mi bos y Mi conoce nan y nan ta sigui Mi. Mi ta dunanan bida eterna y nan lo no perece nunca y ni un hende lo por ranca nan for di Mi man.
Mi Tata kende a duna Mi nan, ta mas grandi cu tur y ni un hende por ranca nan for di man di Mi Tata.
Ami y e Tata ta un.
Nos lucha no ta contra carni y sanger, nos no ta bataya den carni, e asunto aki ta grandi y serio, pa nos perde tempo y haci cos di mucha, enbes di para firme contra plan di e enmigo.
Hesus a bisa bin serca Mi, tur cu ta cansa y carga y lo Mi duna boso sosiego, no tin un carga cu Hesus no por tuma over for di nos, no laga ningun hende gañabo cu bo situacion no por cambia, tur cos ta posibel pa esun cu ta kere, tur cos ta posibel pa esun cu ta esforsa su mes y sea balente.
No laga nada stroba bo, pero pone bo confiansa totalmente den Señor y e lo duna bo e deseo di bo curason.
No tene miedo, pasobra no ta boluntad di Dios, miedo no ta bini di Dios, Dios no a duna nos un spirito di miedo, asina cu bo tende cu miedo ta den bocht reprende e situacion y para firme den Señor, pasobra den nomber di Hesus maldad y inmoralidad lo haña miedo di abo.
E tempo ta trabahoso, hende no kier tende, pero nos esfuerso pa hiba e evangelio, ta continua pasobra esey ta un mandato di Dios.
Ban para firme, ban esforsa, tur dia y tur momento.