Manera a palabra Diabierna ultimo den e reunion cu tur stakeholders, e siman aki e dialogo a continua entre e comision asigna pa representa Tour Operators Uni y Gobierno di Aruba. Durante e prome reunion aki a presenta e version preliminar di loke a yama ‘Nature Driving Protocol’.
Durante reunion cu Minister di Infastructura, Rene Herde, representante nan di ABC Tours Aruba, Fofoti Tours, De Palm Tours, AGW y Aruba Ariba a pasa ariba e puntonan esencial di e protocol cu mester di atencion pa loke ta control y regulacion di vehiculo di motor como tambe maneho y comportacion principalmente ora ta papia di areanan di naturalesa protehi.
Segun Tour Operators Uni, e dialogo cu Prome Minister Mike Eman Diadomingo anochi a contribui na e conversacion nan actual entre tur partido envolvi. E intercambio di punto di bista y preocupacion nan durante e reunion nan aki a yuda crea un base pa sigui busca solucion practico y balansa.
Den cuadro di esaki, Tour Operators Uni ta spera di por yega na un acuerdo como tambe un protocol balansa den cual e interes di tur partido por wordo refleha den un manera adecuado. Tour Operators Uni ta bolbe remarca cu Aruba su naturalesa ta y lo keda na prome luga. Sinembargo, esaki no ta kita cu solucion nan por wordo crea den cual e interes di tur partido por wordo respeta y protehi den un manera balansa.
Pues, di manera proactivo a opta pa traha y presenta e ‘Nature Driving Protocol’. Ambos partido ta di acuerdo cu ta necesario pa haya mas tempo pa haci investigacion independente pa yega na solucionnan mas concreto a largo plazo y regula. E dialogo ta continua cu e meta di logra un acercamiento cu ta tene cuenta cu interes nan di tur stakeholder involucra.
Mester remarca si cu Diamars mainta tabata tin un dialogo programa cu representantenan di Aruba Birdlife Conservation, di cual nan no a presenta. Pues, e postura aki pa cu e conflicto actual ta loke precisamente ta preocupa Tour Operators Uni como tambe e empleadonan cu ta core riesgo di perde trabou of parti di nan entrada.
Mientras tanto, Tour Operators Uni ta keda consistente den dialogo y den nan acercamiento di stakeholder pa por yega na solucion nan cu ta beneficia pero mas importante ainda cu ta tene cuenta cu un y tur partido envolvi y afecta.
