Kambio di lei pa e trahado di Haf i di Areopuerto
Frakshon MAN-PIN den parlamento ta di opinion ku e prinsipio di ‘igual pay for igual work’ ta basá riba e derecho básiko di igualdat ku ta ankrá den nos konstitushon. MAN PIN a entregá un proposishon pa un kambio di lei di ‘Arbeidsregeling 2000’. E kambio aki ta pa kita tur deskriminashon kontra e trahadonan den e sektor di Haf i den e sektor Aviashon.
Nos frakshon a reuní ku sentral sindikal SSK, kual a trese su preokupashon grandi dilanti ku e diskriminashon eksistente di e trahadornan den e sektornan aki ku no ta haña e kompensashon di 100 porshento èkstra ku ta paga otro trahadornan ora nan traha riba dianan di fiesta, ni tin e mes protekshon pa orarionan di trabou i sosiegu òf overtime. Pa koregí esaki SSK a entregá un proposishon di lei na Parlamento. Nos frakshon ta mira e eliminashon di e deskriminashon aki komo importante pa atende. Nos proposishon di lei ta eliminá tur deskriminashon pa e trahadonan den e dos sektornan aki i ta hasi nan igual ku tur otro trahadó.
Pa nos frakshon deskriminashon den nos leinan laboral no por sigui mas. Mester hasi e kambionan di lei kual ta na benefisio di e trahado. Esaki ta bira e di dos proyekto di lei kual ku MAN PIN ta proponé pa eleminá deskriminashon di e trahado. E promé ta e lei pa eliminá e diskriminashon entre e pago di e hoben di 18 te ku inklusivo 20 aña i esnan di 21 aña i mas pa e mesun trabou. Nos ta hopi kontentu ku dia 3 di yüli awor parlamento lo trata e lei pa eliminá e dekriminashon den sueldo minimo pa e hóben den reunion públiko. E lei aki ya a kana e proseso di haña konseho di SER i di Raad van Advies, pa por keda trata den parlamento.
Di e forma aki nos ta keda duna nos aporte komo frakshon MAN PIN, pa drecha bibá di pueblo di Kòrsou.
