Paul Croes di 46 aña, ex minister, acusa di corupcion den oficina, malversacion y soborno a yega na un callejón sin salida, manera ta bisa na Spaño.
Corte di Casacion na Hulanda a rechasa e peticion di Paul Croes pa Hof trata e caso di nobo. Den e decision ta para cu e argumentonan presenta door di Croes no por conduci na destruccion di e sentencia di Hof. Pues cu no tabatin base legal pa esaki. Na mesun momento a bisa tambe cu Hoge Raad no mester motiva pakico a yega na e decision aki.
Na momento di husga e argumentonan no ta necesario pa duna contesta na e preguntanan cu ta di importancia pa desaroyo di husticia.
Pues e argumentonan principal di e violacion di derecho humano basa riba e cantidad di dianan cu el a pasa den isolacion y e hecho cu no tin un carta firma door di PG cu a laga un fiscal atende cu e caso, no a hunga un rol den e caso den Casacion.
E ex-minister di Asuntonan Social, Hubentud y Labor, Paul Croes, cu ta envolvi den e caso di Ibis a bay cassatie. Awe Corte Hulandes a trata su caso y e resultado ta cu el a perde esaki, di cual su sentencia ta keda manera e ta. E caso contra Croes tabata di haber cu soborno, malversacion di fondo y labamento di placa.
Husticia a bisa cu tempo e tabata minister tabata otorga prome permiso, apesar cu a para esaki. A cambio di esey e tabata haya donacion via di su fundacion of pa su eventonan pa recauda fondo. Tambe cu el a uza placa di su funcion politico pa asuntonan personal.
Den prome instancia a conden’e na cinco aña di prison. Banda di esaki a prohibie pa den 8 aña ocupa un puesto publico of como ambtenaar.
El a apela e decision aki y a bay Hof. Aki e castigo a baha te na tres aña di prison. Awo den Casaciom su argumentonan uza pa Hof trata legalmente no tin base.
Cu esaki no ta keda otro cu e mester bay KIA. E castigo di tres aña ta 36 luna y si kita e 3 lunanan di detencion preventivo ta keda 33 luna. Reduccion di un tercera parti ta 11 luna y ta keda 22 luna cu ta un aña y 9 luna.