“Como hende muhe nos mester cuida nos mes pasobra ta nos mester cuida di nos famianan”
October ta e luna cu nos ta para keto na conscientisacion na e malesa di cancer di pecho. Cancer ta un malesa hopi cruel y ta bati na porta di tur famia aki na Aruba. Cancer ta impacta no solamente e pashent pero henter e famia. Prome Minister Evelyn Wever-Croes ta duna un mensahe na tur hende muhe na Aruba enfatisando cu nos mester cuida nos mes pasobra ta nos ta esnan cu lo cuida di otronan.
“Cancer di pecho ta afectando hopi hende muhe na Aruba. Si bo detecte trempran bo por atende cu ne na un forma mas efectivo. Mi ta bisa esaki pasobra mi a wake den e hendenan cerca di mi. Mas trempan bo detecte, mas trempan bo lo sali di e tratamentonan.
Como hende muhe nos mester cuida nos mes pasobra ta nos mester cuida di nos famianan. Nos ta stima nos yiunan, nos pareha, nos mayornan, nos amiga y amigonan y pa nos atende cu nan y yudanan, nos mester cuida nos mes prome.
P’esey mi ta haci un apelacion na tur hende muhe durante e luna di conscientisacion di cancer na pecho, tuma tempo pa examina bo mes y si bo ripara cualkier cos cu no ta usual tuma contacto cu bo dokter. Haci bo testnan, cuida bo mes pa asina bo por cuida di bo famianan”.
Ban sea consciente durante henter luna di October y busca y keda na altura di tur informacionnan cu ta sali den e luna aki pa asina nos por cuida miho di nos salud y pa conscientisa otro hende muhe pa nan cuida tambe.