Manera ya ta conoci Aruba a habri frontera den luna di juli ultimo pa cu e mercado di Merca y esaki a inclui diferente restriccion pa biaheronan cu kier bishita Aruba. Un di e rekisitonan ta e test cu Aruba ta exigi na tur biahero pa haci prome cu yegada of na momento di drenta Aruba. Aki mester menciona cu e aspecto aki no ta uno facil pa cumpli cu n’e, specialmente pa cu e periodo cu e turista tin pa conduci e test y upload e resultado negativo riba e plataforma di imigracion online. Mester haci esaki dentro di 3 dia prome cu efectua un biahe pa Aruba.
Ya ta algun siman cu Aruba, pa medio di A.T.A. y cu asistencia di DVG y AAA, ta den contacto cu e aerolinea JetBlue pa evalua un opcion pa ofrece e test rekeri na biaheronan cu lo ta biahando cu e aerolinea pa Aruba. E proposicion cu JetBlue y The Vault a trece na mesa tawata introduccion di un ‘saliva based’ PCR test cu e biahero lo por haci prome cu yega Aruba. E testnan lo wordo conduci door di e compania The Vault. Autoridadnan concerni na Aruba a wordo envolvi den e proceso aki pa asina evalua e proposicion. E asina yama ‘PCR nasal test’ cu Aruba ta exigiendo na e momento aki ta un poco dificil pa adkeri y debi na esaki e proposicion aki tawata un hopi atractivo. Ta importante pa menciona e hecho cu Aruba lo ta e prome den Caribe pa cual JetBlue lo ofrece di haci e test prome cu biahe pa Aruba. E ekipo medico incluyendo DVG y Lab HOH a haci un evaluacion extenso y a revisa tur documento cu The Vault a comparti y asina a dicidi di aproba e tipo di test aki debi na su confiabilidad.
E aprobacion aki tawata uno hopi importante y esencial pa asina por ‘seal the deal’ cu JetBlue y The Vault. E balansa entre e aspecto medico y economico ta keda un prioridad pa un y tur. E rekisitonan cu ta wordo exigi pa brinda seguridad na e comunidad local y tambe e turistanan cu ta bishitando nos isla ta wordo considera na tur momento.
Aruba un biaha mas ta demostra di ta un ‘forerunner’ y ta prome den Caribe cu cual JetBlue y The Vault ta lansa e programa aki. Mester menciona cu Aruba ta hayando hopi bon comentario riba e protocolnan estableci y ta wordo uza como ehempel pa otro islanan den Caribe. Un danki na tur e socionan cu a traha hopi duro y pone nan maximo esfuerso pa cu e iniciativa aki. Esaki ta hopi importante specialmente debi na e hecho cu JetBlue ta un di e aerolineanan cu ta transportando mas hopi turista pa nos isla.
Minister Oduber ta demostra un vision cla con Aruba ta bai recupera su turismo y economia bek. Aruba ta wordo reconoci internacionalmente pa nos protocolnan y esfuerzonan.