Gabinete Hulandes ta asigna € 15,2 mion mas pa e programa di yudansa den forma di cuminda na Aruba, Corsou y Sint Maarten. Desde e pandemia di COVID-19 y pa motibo cu turismo a cay afo, e habitantenan riba e tres islanan ta experenciando retonan grandi. E problematica di pobresa a aumenta considerablemente riba e islanan.
Secretario di estado Raymond Knops: “Punto di salida di gabinete tabata semper, cu Hulanda no ta laga e personanan mas vulnerable na caya. Durante mi ultimo bishita di trabao, mi a experencia con penoso e situacion ta na sierto parti den nos Reino. Ta di gran importancia pa continua cu e programa di yudansa den forma di cuminda e periodo benidero tambe.”
Desde mei 2020, gabinete Hulandes a pone placa disponibel pa yudansa den forma di cuminda na Aruba, Corsou y Sint Maarten. Na e momentonan aki ta yudando total, mas of menos 80.000 persona cu yudansa den forma di cuminda, ku Hulanda ta haci posibel.
Cruz Cora ta coordina e programa di yudansa den forma di cuminda. Pero ta trahando duro tambe pa bay over riba un forma mas structural di e programa, bou di responsabilidad di e tres paisnan. Cu e medionan aki, yudansa den forma di cuminda ta garantisa te prome di juli 2021.
1 comment