Hisa Bo bandera canta Bo himno sinti Bo orguyoso y ban celebre
Parlamentario Endy Croes ta recapitula historia di nos Himno y Bandera. Awe lo dedica mas specifico na nos Himno di Aruba y den un otro articulo lo amplia riba nos Bandera. Desde 1971 momento cu e Lider maximo Betico Croes a funda partido Movimiento Electoral di Pueblo ( MEP) cu e vision pa lucha pa Status Aparte di Aruba, un Himno y un Bandera a bira di vital importancia como parti di e lucha. Aruba tabata tin mester di su identidad. Betico su vision tabata pa uni e pueblo di Aruba den e fase pa lucha pa nos Status Aparte y fundamentalmente un Himno y Bandera ta forma parti di e proceso pa inculca den nos pueblo e sentimiento di ta orguyoso pa bringa hunto pa un anhelo comun.
Con a yega na nos Himno “Aruba Dushi Tera”?
Historia di nos himno Aruba Dushi Tera. Na aña 1952 Rufo Wever y Juan Chabaya “Padu” Lampe a sinti e necesidad pa composita un piesa cual ta expresa e amor di nos pueblo pa nos isla y asina lanta e sentimento patriotico di cada persona. E grupo musical “De Trupialen” bou direccion di Frere Alexius a hinca e cancion aki den nan repertorio y asina e cancion a crese bira popular cu un sentimiento hopi grandi. Na 1954 De Trupialen a graba e cancion aki riba un disco conosi como 78 rpm e tempo aya. Den añanan 70 momento cu e lucha pa Status Aparte Lidera pa Betico Croes tabata den pleno ehecusion gobierno a instala un comision consistiendo di Maybeline Arends Croes, Rufo Odor, Padu Lampe, Eddy Bennet, Hubert “Lio” Booi y Rufo Wever. Dia 25 dia februari 1976 dicho comision a haci un recomendacion unanimamente na gobierno pa usa e cancion “Aruba Dushi Tera” como nos Himno nacional den un ritmo di wals. Alavez e comision a propone pa añadi un couplet nobo na e cantica esta un di tres couplet. Sr Hubert “Lio” Booi cu su inspiracion a agrega e ultimo couplet” cu Dios por guia y conserva su amor pa Libertad”. Dia 16 di maart 1976 Parlamento di Aruba a aproba oficialemente e himno di Aruba esta “Aruba Dushi Tera”. Dia 18 di maart 1976 den Wilhemina Stadion awe Stadion Guillermo Prospero Trinidad a proclama Aruba Dushi Tera como e himno nacional di Aruba momento a lanta e pa promer biaha e bandera di Aruba. Bou guia di Sra Maybeline Arends Croes acompaña pa e orkesta filharmonico di Aruba dirigi pa Sr. Joy Kock por a scucha nos bunita Himno Aruba Dushi Tera resona. Un momento historico cu nunca por ser lubida. Parlamentario Endy Croes ta pidi tur hende carga nos historia, cultura y identidad den Bo curason. Dia 18 di maart aunke na un manera diferente respetando tur protocol celebra 45 aña di nos Himno y Bandera. Lanta Bo bandera expresa Bo orguyo cu ta jui di e tera aki. Pabien Aruba.
