Awe a inicia e proceso pa cuminsa vacuna varios miembro di Cuerpo Policial. Awe merdia Minister di Husticia, Siguridad y Integracion, mr. Andin Bikker, hunto cu Alto Comisario sra. Vanessa Kock tambe a ricibi nan prome dosis di vacuna. Como un di gruponan di risico cu ta topa cu publico constantemente, a cuminsa vacuna polisnan cu como ‘first responders’ ta den grupo di riesgo, pa asina preveni contagio cu Covid-19 den cuadro di ehecucion di nan funcion y tambe pa preveni di sigui plama e virus. Di e forma aki DVG ta habri e grupo di meta pa incorpora mas ciudadano cu eherciendo nan labor ta poco mas na risico di contagio y pa sigui plama e virus. Aruba ta riba caminda di su recuperacion, ban sigui registra pa por vacuna.
