Minister di enseyansa su deseo y empeño ta pa soluciona problematicanan mas tanto posibel pa crea e espacio pa e trankilidad y paz den comunidad
Durante conferencia di prensa di Gobierno di Aruba dialuna mainta, Minister Endy Croes encarga cu Enseñansa y Deporte, a elabora riba e trabounan haci durante e prome dianan desde cu a asumi e responsabilidad di e carteranan menciona. Den cuadro di esaki Minsiter Croes a menciona varios reto cu tin den enseñansa cual ya a cuminsa atende cu nan door di scucha esnan concerni pa yega na un solucion.
Como Minister di Gabinete Wever – Croes 2 mi lo percura pa scucha tur stakeholder, analisa e dolornan y saca e punto di prioridad den e field aki. Mi ta kere cu si tin e boluntad di tur partido y nos tur kier e mesun meta, nos lo por logra esaki pa e causa comun,’ Minister encarga cu enseñansa Endy Croes a inicia.
Resumen e prome 4 dianan di trabou:
Durante e prome dianan di trabou, Minister Croes a reuni cu diferente stakeholder entre otro sindicato Simar, Directie Onderwijs, Dienst Inspectie van het Onderwijs Aruba, Universidad di Aruba y Colegio EPI (reunionnan cu mas stakeholder lo continua). Durante e reunionnan, un cantidad di reto/ problemanan pa resolve a bin padilanti cu sigur lo haya oido den e maneho di Minister Croes. Algun di e retonan aki ta entre otro:
E dilemma di Zweminstructeur: Minister Croes a contact DRH caba y e siman aki lo haya e conseho final di DRH pa despues sinta bek cu e sindicatonan corespontiente y of representantenan pa haci proposicionnan pa trata di tur manera regla e proximo pago di otro luna y tur por keda contento y satisfecho.
E werksters di SKOA: Minister Croes a indica cu e siman aki lo reuni cu SKOA pa scucha nan banda y bin cu proposicion pa forma un comision y den 30 dia bin cu un solucion structural. A cuminsa haya e sentimento di e problematica aki y ta comprondiendo esaki. Minister Croes ta kere cu un comision di 5 persona representa door di SKOA, di ministerio (expertonan huridico/financiero), financien y experto externo, lo por yuda resolve e problematica aki. Lo pidi nan pa den 30 dia repasa e leynan, vonnis y Ministerraadbesluiten pa bin cu conclusion un conseho final pa asina na un manera elegante, yega na proposicionnan sostenibel y atende cu e poblema aki.
OAA, Openbaare Avondleergang Aruba: Pronto lo cuminsa cu un seccion tambe pa atende cu e problematica aki na unda tambe tin poco duda eyden. E minister ta indica cu ya ta wardando algun conseho pa asina pronto yama e grupo aki aden pa tuma algun decision corecto, structuralmente pa por resolve esaki tambe.
35 alumno di EPB: Un otro problematica cu recientemente a presenta ta cu tin 35 alumno cu no por a cuminsa scol na EPB te cu aworaki pa motibo cu no tin fondo disponibel pa maestronan por duna y habri extra klas y extra les. E titular encarga cu Enseñasa a indica cu ya caba a pidi begrotingscoordinator pa sondea den e propio presupuesto cu a e minister saliente a laga atras. A scucha cu e posibilidadnan tey y cu probablemente e siman aki lo anuncia y yega na acuerdo cu e stichting pa pone e fondonan aki disponibel, habri e klasnan pa muchanan bay scol (e ley ta riba mesa y mster percura pa e recursonan).
Samenwerkingsprotocol: Minister Croes a duna di conoce cu a caba di encontra otro problema cual ta esun cu hospital a kirba nan ‘samenwerkingsprotocol’ cu EPI. Mesora e minister a busca informacion pa e ta na haltura di e problematica y a papia cu Minister di Salubridad, Dangui Oduber pa pronto sinta y busca un solucion lihe pa esaki tambe.
Parti di infrastructura di scolnan: Esaki tambe ta keda un reto pa locual ta fondonan pa mantencion di edificionan. Tin listanan di prioridad di diferente scol y cual lo tin atencion pa asina cu cuminsa cu e trayecto pa presupuesto 2022. E ora ey lo percura pa hinca ideanan y fondonan necesario.
Obhetivo y vision di Gabinete Wever – Croes 2 ta pa soluciona problema. Kisas no ta tur por soluciona mes rapido, pero sigur mi deseo y empeño ta pa soluciona mas tanto posibel y di a manera ey ta crea e espacio pa e trankilidad y paz cu ta buscando pa por Goberna miho pa henter comunidad.