Den cuadro di maneho di COVID-19, recientemente Crisis Team a introduci na nos frontera cambionan cu ta regla admicion di residentenan regresando Aruba for di exterior. Pasajeronan pa Aruba mester ta sea vacuna of getest. Lo siguiente ta aplica:
Pasajeronan cu ta vacuna
● Residentenan cuminsando for di 18 aña cu tin e ‘Boostershot’ no mester test ora di drenta Aruba. Cu ‘Boostershot’ ta referi na e di 3 vacuna di Pfizer of e di 2 vacuna di Johnson & Johnson. Mester upload e certificado di vacuna durante e online registration na www.edcardaruba.aw dentro di tres dia prome cu e vuelo pa Aruba.
Pasajeronan cu ta getest
● Residentenan cuminsando for di 18 aña cu nunca a vacuna of cu no tin e “Boostershot” lo mester test pa drenta Aruba. Si haci e test den exterior, por scoje entre un PCR test (no mas cu 3 dia bieuw) of un ANTIGEN test (no mas cu 1 dia bieuw). Lo mester upload e resultado negativo di e test durante e online registration na www.edcardaruba.aw prome cu e viaje pa Aruba.
● Envez di haci un test den exterior, residentenan por opta pa haci un PCR test na Aruba, ora di yegada na aeropuerto. E ora mester indica esaki y paga pa e test (US$ 75,00) durante registracion na www.edcardaruba.aw (dentro di tres dia prome cu e vuelo pa Aruba).
Otro puntonan pa tene cunta cune
● Mucha residente entre 12 cu 17 aña cu tin 2 vacuna di Pfizer NO mester test pa drenta Aruba pero mucha entre 12 cu 17 aña cu tin unicamente 1 vacuna di Pfizer, SI mester test.
● Mucha residente entre 0 cu 11 aña NO mester test bou ningun circunstancia pa por drenta Aruba.
● Ta recomenda pa semper viaja cu un printout di certificado di vacuna, test result (segun aplicabel) y e “Qualifed to Board” statement cu ta haya despues di registracion na www.edcardaruba.aw.
Pa medio di e comunicado aki Crisis Team ta pidi residentenan cu ta planeando pa biaha y/of tambe residentenan cu ta regresando Aruba pa tene bon cuenta cu e cambionan cu ta na vigor na nos frontera, e cambionan ta conta pa tur hende sin exepcion. Si como residente bo persona no ta desea di gasta placa na test, bo ta wordo recomenda pa vacuna na tempo y es cu no ta desea di vacuna ta wordo conseha pa incorpora e gasto di test pa drenta Aruba den su ‘budget’ na momento di biaha.