Pa un temporada kaba Landsrecherche Kòrsou (LrC), bou di mando di Ministerio Públiko, ta hasiendo un investigashon penal tokante di froude ku sosten di corona kometé dor di un èks-empleado di Desaroyo Sosial, Labor i Bienestar (SOAW).
Ta sospechá ku el a depositá sosten di corona riba su propio kuentanan di banko. Den kuadro di e investigashon, cu a kuminsa for di 8 di febrüari 2022, bou di mando di hues komisario (RC) y den kolaborashon ku Kuerpo Polisial di Kòrsou (KPC), a hasi un entrada hudisial na kas di e èks-empleado aki. Durante di e entrada hudisial a konfiská dokumentu i portadó di dato den interés di e investigashon. A detené e èks-empleado, un hòmber di 32 aña di edat. E investigashon ta kontinuá i lo no hasi mas komentario tokante di esaki na e momento aki.
Landsrecherche ta un órgano investigativo independiente ku un tarea speshal. E ta orientá su mes riba persekushon di delitonan kometé dor di funshonarionan (semi)gubernamental. Landsrecherche ta aktua prinsipalmente den e ámbito di kondukta kastigabel ku gravemente ta afektá e integridat di e atministrashon di hustisia i e integridat di e atministrashon públiko.