Nos prome Altocomisario di polis desde e Status Aparte tabata Sr. Lucas Evaristo Rasmijn, miho conoci como Ari Rasmijn. Ari a nace na Rooi Koochi dia 18 di october 1943, yiu di Miguel Arcangel Rasmijn y Maria Winterdal. Ari a cuminsa su educacion basico na St. Antonius School na Savaneta y siguientemente a caba su Mulo-A na St. Augustinus College na San Nicolas. Ari a traha na varios caminda, entre otro na Shipchandler di Sr. Joy Habibe na San Nicolas, como Cargado y despues Chauffeur. Entre 1963-1964 como Office Boy y Chauffeur na Aruba Chemical Industries (ACI) na Barcadera.
Entre 1 di maart 1964 pa 31 di december 1985 Ari a traha den Korps Politie Nederlandse Antillen y for di 1 di januari 1986 te cu 31 di december 1996 den Korps Politie Aruba. Den e cuerpo di polis el a traha cinco aña na e departamento di trafico na Corsou y un aña na Veiligheidsdienst Nederlandse Antillen. Durane e temporada aki, na aña 1970, el a logra su avond-Havo diploma na Peter Stuyvesant College na Corsou.
Di 1974 pa 1978, cu un studie-opdracht, el a studia na Nederlandse Politie Academie na Apeldoorn, Hulanda y a ricibi su diploma na 1978. Directamente despues di su estudio el a wordo nombra como inspector di polis na KPNA y mesora incorpora den e cuerpo cu base na Corsou te cu aña 1982.
Bek na Aruba el a ocupa funcionnan di Inspectie Surveillance Dienst, Hoofdinspecteur Geuniformeerde Dienst, Hoofdinspecteur Justitie Dienst, Commissaris van Politie (Korpschef). Finalmente na september 1989, tumando e mando over for di Sr. Roland Peterson como Korpschef den e rango como Commissaris van Politie. En total el a funciona shete aña como Korpschef. Entrante 1 di januari 1986, como coronacion di un carera di mas di 32 aña den cuerpo policial el a keda nombra den e rango di Hoofdcommissaris van Politie. E tabata e prome pa ocupa e rango aki den cuerpo policial Arubano, cu a origina dia 1 di januari 1986 cu entrada di e Status Aparte di Aruba. Igualmente e tabata e prome Altocommissaris for di Savaneta.
Ari su hobby ta deporte y el a hunga den varios ekipo riba nos isla. Entre otro volleyball cu e ekipo Rapid di Savaneta, campeon di Aruba e tempo ey, bou direccion di Frere Johannes. Futbol cu Rapid y La Fama; baseball cu Verf Antillana, Zenith, Baby Bakery y seleccion hubenil, representando Aruba na Cuba na 1961. Softball Rainbo Bakery, Central Madeirense, na Corsou cu PSV, Veteranos y Tiburones. Tambe hungado activo y miembro di directiva di Federacion Liga Mayor di softball Arubano, 50-plus. Tennis tambe ta un di su deportenan faborito.
Na 1998, oficialmente Ari a baha cu pensioen y a cuminsa cu AcredeCo Roofing cu actualmente ta conta cu nuebe empleado. Arie ta director y su yiu muhe Caren tambe ta traha den e negoshi. Aunke actualmente Ari ta biba na Sero Blanco, semper el a keda cu un amor grandi pa su bario stima na Savaneta. Actualmente ta gosando di su pensioen hunto cu su cuatro yiunan. Skirbi pa Dufi Kock
Escritor y Historiado
