Barku di Marina Zr.Ms. Groningen nabegando aktualmente pa Wardakosta Karibe Hulandes, den mainta di 16 sèptèmber, a interseptá un transporte di droga di mas o ménos 1200 kilo di kontrabanda. Esaki ta e di 14 kaptura di droga pa Zr.Ms. Groningen, desde ku e barku patruyero ta nabegando den Karibe desde aprel 2022. Ku e kaptura akí Wardakosta KaribeHulandes tin un total di droga di mas o ménos 10.000 kilo ku a konfiská den aña 2022.
Groningen a drenta akshon despues di un notifikashon di e Sentro Operashonal Marítimo (MOC) di Wardakosta Karibe Hulandes. E helikòpter di Wardakosta direktamente a keda dirigí na e lokalidat di e boto sospechoso i esaki a pèrsigui e go-fast riba laman. Na momentu ku Groningen a yega serka di e barku sospechoso, el a lansa su dos botonan rápido pa asina obligá e go-fast pa stòp. E kuater sospechosonan a bordo di e go-fast tabata transportá en total 53 pakete ku tabatin un total di 1200 kilo di kontrabanda. E kuater sospechosonan ademas e
droga a keda entregá na Kuerpo Polisial Kòrsou ku lo sigui ku e investigashon. E kontrabanda ku a konfiská entretantu a keda destruí.
Zr.Ms. Groningen na e momentunan aki ta nabegá komo barku patruyero di Marina Real pa Wardakosta Karibe Hulandes. E barku ta ser desplegá pa aktua na momentunan di operashonnan kontra droga i durante di yudansa humanitario. Ademas e ta keda desplegá tambe pa diferente tareanan di Wardakosta den Karibe Hulandes, tal manera detekshon di peska ilegal, delitonan ambiental i apoyo durante di akshonnan SAR (akshonnan di búskeda i reskate).
