Dutch Caribbean Nature Alliance (DCNA) lo tene su reunion bianual di hunta di dia 16 pa dia 19 di november na Boneiro. E reunionnan di hunta di DCNA ta brinda un plataforma importante pa trata y diseña strategia pa e formanan mas efectivo di apoyo na e organisacionnan di maneho di area proteha (parkenan) pa salvaguarda naturalesa na Aruba, Boneiro, Corsou, Saba, St. Eustatius y St. Maarten. Banda di esey, lo tin un presentacion habri pa publico tocante investigacion y monitoreo den Caribe Hulandes diahuebs 17 di november 7 or di anochi na Captain Don’s Habitat, Boneiro.
E red di conservacion DCNA ta brinda apoyo na e parkenan di e seis islanan di Caribe Hulandes. E componentenan critico cu lo wordo trata durante e reunion di hunta ta strategia DCNA 2030, pagamento di Fondo Fiduciario pa Conservacion y strategia di recaudacion di fondo. Ademas, e secretaria y e gruponan di trabou di DCNA lo brinda actualisacion pa mehora e esfuersonan di investigacion y monitoreo y participacion di e hobennan. E reunion di hunta di DCNA tambe ta un oportunidad importante pa cada un di e parkenan colabora, comparti recursonan y intercambie informacion y idea. Trahando hunto, cada isla por siña di otro, maximalisa nan exitonan y siña di e experiencianan mas desafiante.
DCNA tabatin algun cambio emocionante desde su ultimo reunion di hunta. Tabata un despedida sincero di nan anterior director, Tadzio Bervoets, y a duna un caluroso bonbini na e miembronan nobo di ekipo: Arno Verhoeven como director nobo y Frederique van Randwijck como gerente di relacion. Ademas di e administradonan di conservacion y e diverso expertonan di hunta di DCNA, International Union for the Conservation of Nature (IUCN-NL), World Wide Fund for Nature (WWF–NL), BirdLife Netherlands and the Ministry of Agriculture, Nature and Food Quality (LNV) tambe ta participa den e reunionnan di Hunta di DCNA.
Presentacion Publico
Banda di esaki lo tin un presentacion publico cu e titulo “Mi ta mira bo: Investigacion y Monitoreo den Caribe Hulandes” na encargo di Diego Marquez, kende ta apoya e Grupo di Trabou di Investigacion y Monitoreo di DCNA. Investigacion y e monitoreo den Caribe Hulandes tin hopi reto asocia. Den su presentacion, Sr. Marquez lo elabora tocante e retonan aki y, utilisando e investigacion y monitoreo di parha como ehempel, lo presenta solucion pragmatica tocante con compronde miho e sistemanan natural aki. E presentacion ta habri pa publico y ta tuma luga dia 17 di november 7 or di anochi den sala di reunion di Captain Don’s Habitat.
Tocante DCNA
DCNA ta un organisacion no lucrativo crea pa proteha entorno natural y pa promove maneho sostenibel di e recursonan natural, tanto riba tera como den lama, na e seis islanan di Caribe Hulandes. E mision di DCNA ta pa salvaguarda naturalesa den Caribe Hulandes yudando y asistiendo e Organisacionnan di Maneho di Area Proteha. Door di crea un voz uni, yuda sigura un financiamento sostenibel, comparti recurso, habilidad y experiencia y promove divulgacion educativo y consciencia publico, DCNA por fortalece e red y por apoya e iniciativanan di conservacion di naturalesa den henter Caribe Hulandes.
Mantene bo mes informa
Pa sigui cu e actividadnan di DCNA, keda atento na e paginanan di red social di DCNA: Facebook (Aliansa pa Naturalesa di Caribe Hulandes), Instagram (DCNAnature). Pa haya sa e ultimo den investigacion y monitoreo den Caribe Hulandes, sigura bo mes di inscribi bo na boletin digital di tur luna BioNews (https://dcnanature.org/news/)