Recientemente Minister Maduro di Cultura a reuni cu sr. Chibi van der Hans riba su investigacion y publicacion riba Aruba su Carnaval. Sr. Van der Hans ta conoci como fotografo den Carnaval cu ta percura pa e revista Bacchanal cu ta contene e agenda, potret y informacion di e gruponan di Carnaval.
Cu un coleccion asina grandi di potret y un peticion fo’i e mundo academico pa haci un investigacion riba Aruba su Carnaval, sr Chibi a cuminsa 7 aña pasa cu su investigacion riba e origin di Carnaval na Aruba. E publicacion ta conta cu 3800 potret y 20 mil cara di participante di eventonan di Carnaval di cual tin nomber di 250 persona den e index di e buki.
E publicacion ta den fase final y Minister Maduro ta spera cu sr. Chibi van der Hans banda di Gobierno, lo por conta cu e apoyo necesario den comunidad pa por finalisa e buki. Esaki sigur ta un documentacion historico importante di Carnaval cu ta enrikese e herencia cultural di Pais Aruba.
