Mientras dianan ta pasa, bida ta sigui brinda nos cu sorpresanan agradabel y tambe menos agradabel, lesnan di bida pa nos cada un gana mas experiencia di bida pa comprende bida miho. Hopi actividad social cultural ta tuma lugar y nos ta purba di bishita mas tanto cu nos por, segun salud ta duna. Lady Ruth ta hopi contento cu tur e reaccionnan cu e ta ricibi pa cu su relatonan semanal den nos prestigioso corantnan local y tambe on line. Nan ta gusta nos versionnan di actividadnan social con nos ta trese nos opinion y sintimentonan padilanti den formanan bunita y positivo. Nos ta hasi esaki di curason y ta spera cu lectornan por keda un crenchi inspira di e actividadnan cu ta tuma lugar ariba nos isla, principalmente nos grandinan cu no ta of no por sali bay tur caminda mas. Manera ta e caso di e actividad cu a tuma lugar na Centro di Bario Playa Pabao no mucho tempo atras cu charlanan bunita, informativo y educativo di Ramon Todd Dandare Mag. Ling y Dr. Joyce Pereira. Nan a trata e tema di Esclavitud y nos dushi Papiamento. E sala tawata completamente yen di personanan interesa pa scucha y sinja algo mas den bida. Ta tur dia nos tur ta sinja algo nobo, consiente of inconsientemente. Ta hopi nomber tin riba e lista di e famnan di esnan cu tawata tin un of mas miembro di famia como esclavo hopi anja pasa. Aunke no tawata asina pisa y doloroso manera na nos isla ruman Corsouw. Nos por a wak y tende hopi di e tema di Esclavitud den e ultimo simannan na e.o. e actividad na Neihgba San Nicolas y tambe na Biblioteca Nacional y Cas di Cultura. Nos ta spera di por bin cu un chispa chikito di esakinan tambe mas oro. Lady Ruth a gusta e manera cu Dr. Joyce Pereira a habri su parti di presentacion na CBPP cu e pregunta :” Pakico Papiamento ta importante pa bo ? Hopi tawata e contestanan , e.o. cu pasobra ta pensa na Papiamento, of pasobra esey ta nos lenga materno cu nos tin cu salvaguardia. Sra. Evelyn Ruiz Croes a habri e anochi aki , recitando un bunita poema na Papiamento di un otro autor. Mas bo tende nos idioma Papiamento, mas bo tin cu stim’e. E ta zona manera e melodianan di mas dushi y di mas bunita di un cancion eterno cu ta inspira e alma, mente y curason. Nos no por a keda scucha henter e charla di Joyce, pa motibo di un otro compromiso, pero si nos a scucha e charla “kort en krachtig di Ramon. Nos a nota cu e publico tawata hopi enthusiasma cu hopi pregunta relaciona cu e temanan presenta pa personanan bon studia y gradua y cu titulonan grandi , pues, nan sa nan materia bon. Pordona Lady Ruth si e sa skirbi algun palabra fout den Papiamento, y sinti cu n’e si su amor y pasion pa nos idioma. No ta pornada nos a skirbi nos bukinan y nos poemanan keto bay na Papiamento. Nos tambe ta orguyoso di nos lenga materno. Nos a purba di trese un chispa masha chikito mes di e anochi interesante aki na CBPP, djis pa lagabo sa cu ela tuma lugar exitosamente. E tawata un combersatorio organisa pa Fundacion Lanta Papiamento pa conmemora dia di abolicion di esclavitud cu e tema :” Sclabitud y Papiamento”. Despues a sigui cu e combersacion den sala caminda tur presente por a duna nan opinion y discuti sanamente tocante e topico. Mi dushi hendenan, danki pa lesa nos relato , corda sigui cuida curpa, mente, alma y curason. No hasi cu un otro locual bo no kier e otro hasi cu bo.
Y…sigui duna Dios danki pa cada dia regala. Un “bearhug” pa boso tur ! Love you too !
