Tin poder y autoridad den nos boca , ora nos Fe y Confiansa ta den nos Dios Todopoderoso.
Den Job 22:28 Señor ta bisa Job: Tambe lo bo declara algo,y esey lo wordo estableci pa bo, y lus lo briya riba bo camindanan.
Ta nos deber ora nos kier mira cambio den nos hubentud, kende ta di berdad e futuro di nos pais, pa nos declara y profetisa bondad riba nan.
Nos tin cu papia locual nos kier mira y no papia locual nos no kier mira, aunke nos sa cu e enemigo tin e hubentud cansa, e palabra nan cu ta sali for di nos boca mester ta palabra positivo deseando y demostrando, grandesa di Dios.
Pasobra nos sa cu solamente Dios por drenta den curason di nos hubentud y haci cambio, pa medio Su Yiu Cristo Hesus.
Como mayor nos tur tin un trabao of un mandato di Dios, pa nos lanta nos muchanan den e disiplina y instruccion di Señor.
Pesey nos mester di guia di Señor pa nos hacie, pasobra riba nos propio forsa e ta bira dificil.
E muchanan mester mira un ehempel o mihor bisa nos ta testifica na nan cu nos bida, kico Dios a haci pa nos, y con Dios a cambia nos.
Den Isaias 44:3 palabra di Dios ta bisa; Lo Mi basha awa riba e tera cu tin sed ,y coridanan di awa riba tera seco, lo Mi basha Mi Spirito riba bo yuinan y Mi bendicion riba bo desendientenan.Nan lo spruit meymey di yerba, manera populir banda di coridanan di awa.
Den Juan 10:10 nos tur ta na altura cu e ladron ( e diabel) ta bini solamente pa horta mata y destrui.Pesey nos Señor Hesus Cristo a bini pa duna bida, y bida na abundancia.
Pesey nos tin di alinia nos curason cu Cristo Hesus y declara lo siguiente riba nos hubentud.
Salmo 127:3 Mira yuinan ta e herencia di Señor,e fruta di barica ta un recompensa.
Ta Señor mes a duna yiu na cada mayor awel nan mester wordo bon cuida, y bon lanta.
Nos ta declara Salmo 91:11 riba bida di nos yuinan bisando: Pasobra E lo duna Su angelnan encargo tocante di bo, pa wardabo den tur bo camindanan.
Aki nan nos ta papia y pidi Dios pa e pone su angelnan rond di nos yuinan, pa nan ta bon cuida.
Boso hobennan , mescos sea sumiso na boso ansianonan ( Mayornan) y boso tur, bisti boso mes cu humildad pa cu otro, pasobra Dios ta resisti e orguyosonan ma ta duna gracia na e humildenan.
Sea sobrio, sea alerta. Boso adversario e diabel, ta cana rond manera un leon cu ta gruña, buscando ken e por devora.( 1 Pedro 5+8).
No ta Ami a ordenabo,Sea fuerte,y tene curashi!No tembla ni desmaya,pasobra Señor bo Dios ta cu bo unda cu bo bay. ( Josue 1:9).
Ta nos mes mester encurasha nos yuinan, pa cana den e bon caminda di Señor, pasobra nos como mayor ta nan prome mentor, esun cu tin e mandato y deber pa lanta yuinan sano.
Nos tin cu bisa nos yuinan cu nan ta e lus di mundo y e salo di tera, pa tur caminda cu nan bay nan comportacion ta demostra cu nan ta berdadero sirbido di Dios.
Pesey Pablo ta bisa na e hoben Timoteo: No laga ningun hende menosprecia bo hubentud, ma mas bien den palabra, conducta,amor, fe,y puresa, demostra bo mes di ta un ehempel, pa esnan cu ta kere.( 1 Timoteo 4:12).
Senor warda y bendiciona nos hubentud ricamente.