Aruba ta drentando e ultimo tres weekend nan gandi di periodo di Carnaval. Pa loke ta trata e servicio di ambulance di IMSAN ta prepara manera tur aña unda cu ta duna e servicio na momento cu esaki ta necesario. Lo ta bay tin tres ambulance cu lo ta pendiente riba e rutanan unda cu lo ta bay tin un bike team y tambe personal den comando kamer.
Den e parada di flambeu ultimo e carnaval tabata un parada cu ta conoci cu ta duna hopi asistencia compara cu e parada di fantasia cu ta e parada di mucha cu semper ta bay relativamente trankilo.
Hefe di ambulance Liberato Hoek ta indica cu durante di carnavalnan grandi e ambulance nan ta keda reparti completo riba e rutanan di carnaval y ta traha 24 ora. Banda cu tin tres ambulance riba e ruta tin tambe tres ambulance pafo di e ruta cu ta keda atende e asistencianan cu ta pasa pafo di Carnaval pa situacionnan di emergencia.
Na momento cu mester asistencia di polis e ciudadano por meld na cualkier di un di e polisnan cu ta cana den ruta di carnaval y na momento cu e melding drenta ta bay via di comando kamer cu KPA tin , den e comando kamer aki tin un personal di ambulance tambe presente y cu ta guia e coleganan di ambulance cu tin riba ruta pa yega na e melder pa asina por duna asistencia na e persona cu tin mester.
Si yama 911 tambe por tuma e melding y lo pasa esaki pa e comando kamer y asina e mes un proceso ta keda encamina. Ta hopi importante pa mira rond y wak unda ta para pa meld precies unda ta pa asina e ayudo por yega mas lihe. Por uza un number di un palo di luz of un edificio cu ta wak cerca y asina por yega mas cerca cu ta posibel.
Tambe tin diferente puntonan cu ambulance ta uza pa hopi aña caba y ta importante pa e ciudadanonan laga e espacio aki habri na momento cu e ambulance kisas a bay hospital bin bek y cu e mester para riba su post bek pa asina keda pendiente si tin mas melding. Importante ta pa e ciudadano nan no blokia e ambulance pa por Sali lihe.
No ta permiti pa hala e baricada y lint unda cu e caminda ta destina pa ambulance nan para , esaki ta prohibi pa haci. Na momento cu haya un auto para den e vak di ambulance ta yama mesora pa takel e auto y e costo ta cay pa e persona.