Trahando pa desaroya e grupo hoben di triatlon
Algun siman atras a reuni cu miebronan di directiva, entrenadornan y algun di e atletanan di Aruba Triathlon Association (ATA), pa asina combersa y elabora riba e plan di entrenamento cu tin pa aña 2025. Manera ta conoci, e deporte di triatlon ta uno compleho, como e ta 3 disciplina den 1, unda e atleta mester sa landa, core bais y core bon pa asina logra resultado.
Durante e reunion aki, a splica con e entrenamento ta planifica pa cada categoria, como tin atletanan den e categoria Youth, cu tin bista riba e weganan di 2026, manera entre otro e weganan “Juegos Suramericanos de la Juventud 2026” y “Youth Olympic Games”.
Mescos a haci pa e atletanan den categoria Junior, cu tin e Weganan “Panamericano Junior ASU2025” cu lo tuma luga augustus benidero na Asuncion,Paraguay. Entrenador Glennon Eights a duna un splicacion di con e ta traha pa cada un di e diferente obhetivonan y con ta prepara pa e diferente eventonan na caminda. E atletanan Junior ta den proceso di clasifiacion pa ASU2025, unda nan lo bay Asuncion,Paraguay den luna di april pa e clasificatorio.
COA ta desea e federacion di triatlon y tur atleta hopi exito cu e proceso deportivo nan dilanti.
