Músikonan di diferente kultura a topa
Resientemente a tuma lugá den kurá di SKAL e promé Sunset Jam Session. Tabata un anochi spesial pa músikonan a topa ku otro i tambe topa ku e servisio di Kultura Arte i Literatura.
Gregory Colina konosido músiko yu di Kòrsou a guia e promé Sunset Jam Session. Gregory tin un trayektoria respetá den músika. Gregory a forma un banda básiko huntu ku otro legendario músiko Boy Janga di Boneiru , e konosido perkushonista Garry Francisco i e bahista Faysel Francisco tambe a forma parti di e banda Descarga ku Gregory a forma pa e anochi aki.
E anochi a kuminsá ku palabranan di bon biní dor di representantenan di SKAL sr. Segni Bernadina kende ta Cultuur Coach i tambe hefe interino di SKAL Timoteo Silberie. Meta di e anochi ta pa músikonan na Boneiru topa ku otro, interkmabiá konosementu, krea lasonan di kooperashon, pero tambe pa duna SKAL un bista kon leu músika ta na e momentunan aki na Boneiru. Kiko nos tin na músiko i músika i kiko ta e deseonan di músikonan na Boneiru.
Seguidamente tabatin un tayer riba e arte di improvisashon. Gregory a splika entre otro di e diferente forma di klave i e origen di esaki i e influensia riba nos músika. Ela elaborá tambe riba e parti didáktiko di e klave. Kada músiko a mustra riba nan instrumènt faborito kon nan ta kombiná ku e klave. Boy Janga a duna un demostrashon ku su konga, Garry Francisco a splika e influensia di timbal i Faysel a splika e trabou di un bas den músika. E parti di tayer tabata sumamente interesante sigur ora bo mira e interes di e músikonan hasiendo preguntanan i tambe partisipando aktivamente.
Despues di e parti di e tayer klasikal e músikonan a bai riba e plenchi di SKAL kaminda ku nan kada un a kohe nan respektivo instrumènt i a djòin e banda pa asina e Jam Session por a kuminsá. Tabata sumamente interesante pa mira kon lihé i ku un alegria e grupo di músiko aki a uni i hasi músika i por a mira interkambio di konosementu i estilo . Tabata reina un ambiente dushi riba e plenchi di SKAL.
Durante di e Jam Session a bini diferente punto interesante dilanti, Algun músiko a bisa ku nan a gusta e inisiativa pa organisá e Jam Session, otro a bisa ku e mester ta tur siman i no un biaha pa luna. E nesesidat pa tayernan ku ta bai mas profundo den e materia músikal prinsipalmente e parti didáktiko a bini dilanti for di diferente músiko. Loke ku sigur e anochi aki a sòru pe tabata union bou di músikonan. Tabata impreshonante pa mira músikonan di diferente kultura djòin otro, tabatei presente boneriano, cubano, colombiano, brasilero, kurasoleño, hulandes eurpeo i merikano. Na final di e anochi Segni Bernardina a gradesi tur presente na nòmber di SKAL i ku por mira atras riba un anochi eksitoso i ku lo bai evaluá esaki i organisá den un futuro serkano e siguiente Sunset Jam Session ku probablemente lo tuma lugá dia 16 di yüni binidero.
