Entradanan hudisial ku detenshon
Djárason 16 di yüli, den oranan trempan di mainta a tene entrada hudisial na dos kas, unu na Kaya Mariana i e otro na Kaya Italia. A detené un hòmber di inisial A.J.R. di 19 aña di edat en konekshon ku un ladronisia ku violensia ku a tuma lugá den luna di mei 2025. A konfiska artíkulonan relevante pa e investigashon. Investigashon den e kaso ta kontinuá.
Vehíkulonan na kandela
Djárason 16 di yüli, alrededor di 4 or di mardugá, ‘meldkamer’ sentral a risibí notifikashon tokante kandela na Kaya Alzira. Polis ku a akudí na e sitio a evakuá habitantenan di un kompleho di apartamentu pa motibu di seguridat. Kòrtiku despues brantwer a yega na e sitio i a logra dominá e kandela.
A resultá ku un skuter i dos outo ku tabata stashoná na e adrès ariba menshoná, a kimá por kompletu. Un pikòp tambe a haña daño pa e motibu aki. Polis a tuma keho di insendio na e sitio. Ta investigando e kaso.
Detenshonnan pa manehá bou di influensia di alkohòl
Den e dianan ku a pasa, a detené total 3 shofùr pa manehá bou di influensia di alkohòl. Tur shofùr a hasi un tèst di supla, ku resultado positivo dor di kua a detené nan i a hiba nan warda di polis pa un análisis di rosea.
A detené un dama di inisial S.F.E. di 40 aña di edat na Kaya Spaña, despues ku e tabata kore zeilu ku su vehíkulo riba kaminda. Un patruya a par’é pa un kòntròl. For di esaki a resultá ku e tabata bou di influensia di alkohòl. A konfiská su reibeweis.
A detené un hòmber di inisial S.A.V.Q. di 39 aña di edat i un dama di inisial M.A.R.M. di 37 aña di edat na Kaya Korona. A detené ámbos pa manehá bou di influensia di alkohòl, despues ku nan tabata enbolbí den un aksidente ku daño signifikante pa motibu di keda sin duna preferensia. E sospechoso di inisial S.A.V.Q. a haña prohibishon di manehá pa 3 ora i e sospechoso di inisial M.A.R.M. a haña prohibishon di manehá pa 5 ora. E durashon di e prohibishon di manehá ta dependé di e kantidat di alkohòl ku midi den sanger na e shofùr.
Bo a mira algu sospechoso? Yama 717 8000 òf e liña di tep anónimo 9310.
