Ayera e presidente Americano a anuncia un declaracion di ‘estado di emergencia’ cu a laga tur Americano babuca, di Washington D.C. e capital di teritorio Americano. Segun Trump e capital Americano a bira un zona peligroso y ‘nan lo tuma e Capital bek’. E presidente a subraya cu e lo desplega e ‘National Guard’ pa asina tuma control di e districto di Columbia di polisnan y autoridadnan cu tin trahando caba eynan. Según Trump, cu ta conocí pa exagera, a bisa e reporteronan cu nan lo no kier wordo‘ horta, viola of tira mata’ y cu e cantidad di homicidionan na Washington D.C. ta mas halto cu capitalnan di otro paisnan manera Bogota, Colombia. E mandatario a sigi bisa cu e robo di auto ta na nivelnan mas halto den historia, ‘car-jacking’ ( secuestro den bo mesun auto) tan a nivelnan mas halto den e ultimo 25 añanan.
E mandatario a sigi splica cu e capital di e pais mas poderoso na mundo a wordo tuma over door di ‘gangnan’ y ‘ criminalnan habriento di sanger’ , hendenan droga y sin dak. Remarcabel ta cu mientras president Trump tabata dunando su discurso, e cadena di noticia CNN, tabata pone e grafico nan cu ta demostra cu tur e exageracionnan di e mandatario, no ta cuadra cu e berdad. Crimen a wordo reduci den 2023 y 2024 y CNN a demostra e cifranan cu e cuerpo policial di e capital Mericano a suministra na e
cadena noticioso. Tin menos homicidio y menos crimen den tur metrics cu a wordo midi na e capital americano. Sin embargo awe mainta mas of menos 800 miembro di e Guardia Nacional a wordo desplega den e capital di e nacion Americano.