Durante su bishita oficial na Hulanda, Prome Minister Mike Eman a reuni cu Presidente di Eerste Kamercommissie voor Koninkrijksrelaties Sr. Paul Rosenmöller. Sr. Paul Rosenmöller tin atencion y bon conocemento di e islanan di Caribe Hulandes. E relacion cu Sr. Rosenmöller ta bay bek atras hopi aña y ta cu gran satisfaccion cu Prome Minister Eman por a hiba combersacion profundo cu e politico Hulandes.
Ta importante pa un persona cu e conocemento amplio di e islanan di Reino ta riba e posicion clave asina, mirando cu hopi biaha tin politiconan cu no conoce nos islanan cu tin cu carga debatenan relaciona cu e islanan di Caribe Hulandes.
A atende cu e temanan di interes manera con ta haci reparticion mas husto di entradanan di nos pais relaciona cu e inflacion, perdida di poder di compra y un desconexion entre e desaroyo economico y e realidad economico di nos hendenan.
Pa trece alivio, Prome Minister Eman a splica Sr. Rosenmöller di e esfuersonan cu Gabinete AVP-Futuro a haci desde prome dia den Gobierno, manera e aumento di pensioen, e expansion di e lista positivo di remedi di AZV pero tambe e ayudo pa personanan cu menos recurso. Esakinan ta temanan cu Sr. Rosenmöller como miembro di e partido Groen Links, ta indentifica su mes bon cu nan.
Ademas a trata e tema di fondo di inversion, den cual a presenta e pensamento cu mester crea un fondo di inversion pa Reino. Pa logra esaki, Aruba, Corsow y Sint Maarten, por pone e placa hunto cu nan lo mester paga bek pa e Covid lening, den e fondo di inversion. Prome Minister ta buscando un base amplio den politica Hulandes pa logra convence Gobierno di Hulanda pa bay di acuerdo cu e fondo di inversion aki. Prome Minister Eman ta consciente cu e tarea aki no ta uno facil, pero ta optimista cu por logra mirando e beneficionan cu esaki por trece pa Reino Hulandes.
Premier Eman ta kere cu ta husto pa transferi e debe aki den un fondo di inversion, pagando e suma tur luna pero den un fondo di Reino. Ademas e ta habri pa e islanan BES por haci apelacion pa un cierto cantidad di e fondo aki den situacionnan incidental. Por aloca parti di e fondonan aki pa inversion y e otro parti pa crea un buffer cu ta duna espacio financiero den momentonan di calamidad pa por recupera.
