Un actividad historico pa comision di atleta di Comite Olimpico Arubano
Despues di un periodo largo di preparacion y planificacion, Aruba Athletes’ Commission (AAC) hunto cu Comite Olimpico Arubano (COA) a organisa pa prome biaha den historia di Aruba un “Athletes’ Forum” unda cu alrededor di 50 atleta a participa. E foro aki a conta cu un programa varia y dinamico unda a trata diferente topico cu no ta solamente interesante, pero importante pa e desaroyo di e atletanan como hobennan capacita den diferente ramo cu lo sirbi nan durante nan carera deportivo y despues den nan bida profesional.
Pa duna inicio na e foro aki, Presidente di COA Wanda Broeksema a comparti algun palabra unda e la elogia e comision di atleta pa e iniciativa pa organisa un evento historico cu sigur lo tin su balor agrega. Banda di esaki, a dirigi palabra na e atletanan presente, cu a representa alrededor di 10 diferente deporte unda a felicitanan pa forma parti di evento importante aki y pa mustra iniciativa di kier siña mas y engrandece nan mes como atleta y persona.
Minister di Deporte mr Gerlien Croes tambe a comparti un mensahe cu e hobennan presente, unda a duna di conoce di ta contento pa mira tanto boluntad di e hobennan pa kier forma parti di un evento educativo y asina eleva na nivel no solamente como atleta, si no como embahadornan di e comunidad deportivo y “role models” di tur atleta na Aruba. Minister Croes a termina deseando tur atleta exito den nan trayectoria deportivo.
Comite Olimpico Arubano ta felicita Aruba Athletes’ Commission pa e organisacion di e prome Athletes’ forum na Aruba. E evento aki ta mustra cu atletanan local ta desea di haya mas oportunidad di siña diferente cos nobo y tin un plataforma nacional unda por comparti cu tur otro alteta y deporte riba nos isla. #TEAMARU
Press release: Comite Olimpico Arubano (COA)
